Kawa sa politika sa Leyte nisugod na og bukal

CEBU, Philippines — Bisan og sunod tuig pa ang eleksiyon apan ang kawa sa politika sa Probinsiya sa Leyte nibukal na.

Kini human si kanhi Leyte 3rd district representative Vincent "Ching" Veloso niadtong adlaw'ng Lunes nianunsiyo nga makig-atbang sa kasamtangang Leyte 4th District Representative Richard Gomez sa piniliay sunod tuig.

Nihimo si Veloso sa iyahang plano sa politika sunod tuig human sa iyang opisyal nga pagbalhin og rehistro sa Isabel nga ubos sa 4th district sa Leyte.

Si Veloso nga kanhi huwes sa Court of Appeals ug kanhi chairman sa House Committee on Justice nakigtagbo sa iyahang mga dumadapig niadtong Lunes.

Sa maong tapok gipasalig ni Veloso nga patas ang pagpanghatag og pundo sa distrito.

Lima sa pito ka mayor sa ika-upat nga distrito apil ang opisyales sa ikatulong distrito ang nitambong sa kalihokan.

Ang mga nitambong gilangkuban nila ni Merida Mayor Rolando Villacencio, Matag-ob Mayor Bernardino Tacoy, Palompon Mayor Ramon Oñate, Albuera Mayor Sixto Dela Victoria, ug Isabel Mayor Edgardo Cordeño.

Mga incumbent mayor sa third district diin nahimong kongresista kaniadto si Veloso nitambong usab sa kalihokan.

Human maka-file sa iyang pagbalhin sa voter's registration usa ka caravan ang gihimo ug adunay open forum nga gitambongan sa mga supporter ni Veloso diin gipahigayon kini ngadto sa Isabel Sports Complex.

Atol sa forum, si Veloso nagkanayon nga ang mga mayor sa kalungsoran ug pipila ka business groups ang nag-request niya nga modagan diin nibalibad siya niini apan gumikan sa pag-aghat sa iyahang mga dumadapig gidawat niya ang hagit.

Dugang ni Veloso nga moumol siya og legal team nga moserbisyo sa distrito nga walay bayad aron motabang sa mga biktima sa pagpanadaog sa ika-upat nga distrito. BDB BANAT NEWS