Kapolisan sa Argao nadasig sa pasidungog nga ilang nadawat
CEBU, Philippines — Mas naghatag og kadasig sa kapolisan sa lungsod sa Argao ang pag-ila sa Sangguniang Bayan sa Municipality of Argao sa maayong trabaho nga gipakita sa Argao Police Station pinangulohan ni Police Major Ivy Bartolome.
Nipalabang og resolusyon ang Sangguniang Bayan niadtong Enero 26, 2024 nga nagdayeg sa malampusong pakigbatok sa Argao Police Station sa tanang matang sa kriminalidad sama sa illegal drugs, illegal gambling, loose firearms, wanted persons ug uban pa.
Sukad sa paglingkod ni Major Bartolome isip hepe sa Argao Police Station gikan sa June 14, 2023 hangtud sa December 2023 nakahimo kini og 29 ka operasyon batok illegal drugs nga miresulta sa pagdakop sa 39 ka mga illegalista ug nakompiskar ang 281.94 grams nga shabu nga nagkantidad og P1.9 million ug pulos napasakaan og kaso.
Nakapahigayon sab sila og 17 ka operasyon batok illegal gambling diin 29 ka sugarol ang nadakpan.
Sa operasyon batok loose firearms, nihimo sila og 18 ka operasyon, 14 ka tawo ang ni surrender sa ilang mga armas, upat ang nasakmit pinaagi sa implementasyon sa search warrant ug 10 ka armas ang gideposito sa Argao Police Station.
Nadakpan sab ang duha ka most wanted ug walo ka laing mga wanted persons.
Nunot niini si Police Major Ivy Bartolome, hepe sa Argao Police Station nalipay nga na-recognize ang ilang trabaho ug gipasalig niini nga dili sila molugak sa ilang paningkamot nga masumpo ang tanang matang sa kriminalidad aron magpabiling hapsay ug malinawon ang lungsod sa Argao. (BANAT NEWS)
- Latest
