Magsuong snatcher nga nag-viral sa pagpanglabni gipangita sa kapolisan
CEBU, Philippines — Nailhan na sa Cebu City Police Office (CCPO) ang duha ka suspetsado sa pagpanglabni sa dalan Natalio Bacalso Avenue niadtong niaging semana nga nakuhaan og video ug ni-viral diha sa social media.
Matud ni Police Lieutenant Colonel Janette Rafter, deputy city director for operations ug tigpamaba sa Cebu City Police Office nga magsuon ang mga suspetsado nga nilabni sa cellphone sa pasahero sa usa ka bus.
Ang duha nagpuyo kini diha sa A. Lopez, Barangay Calamba niining siyudad.
Natultolan sa kapolisan ang gipuy-an sa mga responsable sa krimen ug dihang giadto kini sa kapolisan sa ilang pinuy-anan nasuta nga wala na niuli ang mga suspetsado human nakahibawo nga nakuha sa close circuit television (CCTV)ang ilang gibuhat.
Apan nahibaw-an sa kapolisan nga naa ra nagtago sa kasikbit nga siyudad ang mga suspetsado.
Nakig-alayon na ang CCPO pagkompirma sa nahimutangan sa mga suspetsado aron madakpan kini ug dili na makabiktima ngadto sa lain.
Niapelar ang CCPO sa katawhan nga kong nakaila o nakahibawo sa gitagoan sa mga suspetsado dili magpanuko og report sa kapolisan.
"So og naa man gani nakaila o nakabalo asa ning mga tawhana karon palihug lang ko og text or message available gyud ang atoang mga Facebook accounts sa atong mga stations gikan sa 1 to 11, you can message kong asa ni karon mga tawhana kay ato ning tabangan sa pagpangita kay og dili ni nato tabangan molaganap gyud ni sila", panawagan ni Rafter.
Nasayran nga ang maong mga suspetsado giingong nalambigit na usab sa pagpanglabni kaniadto. BDB (BANATNEWS)
- Latest
