Adunay lima ka adlaw pag-reactivate sa sim card nga wala marehistro

CEBU, Philippines —  Untop alas 12:00 sa tungang gabii kagahapon dili na magamit ang sim card number human napupos ang deadline sa sim registration.

Kagahapon pipila ka mga sim card users niadto sa buhatan sa National Telecommunications Commission-7 aron makaapas sa kataposang adlaw sa registration human nataligam-an nila ang pagparehistro sa ilang sim card numbers.

Giklaro ni Engineer Felipe Gumalo, Jr., officer in charge sa Enforcement and Operation Division sa NTC-7 nga kutob lang sa alas 11:59 sa gabii ang deadline sa sim registration base sa balaod.

Nagpasabot nga alas 12:00 sa tungang gabii deactivate na ang mga sim card nga wala marehistro.

Aduna hinooy lima ka adlaw nga grace period aron ma-reactivate ang numero apan ipaagi sa link sa mga Telcos nga gihulagway nga hilabihan ka hasol diin kong mapakyas human sa lima ka adlaw dili na magamit sa hingpit ang numero o sim card.

Base sa datos sa NTC niabot ngadto sa 105,260,340 ang narehistro nga sim cards o 62.65 porsyento sa 168,016,400 ka subscribers lukop nasud.

Sa Globe Telecom adunay 55 milyones users ang nakaparehistro o 92 porsyento sa ilang active sim card users.

Samtang sa PLDT Smart adunay 75.02 porsyento sa ilang mga subscriber ang rehistrado na.

Gihulagway nila nga malamposon sa kinatibuk-an ang sim registration bisan pa nga adunay wala pa molihok aron magparehistro.

Subay niini, gipanawagan ni Talisay City Mayor Gerald Anthony “Samsam” Gullas, Jr. ang mga Talisaynon nga magparehistro na sa ilang mga sim card.

Kini aron dili maabot sap unto nga di na magamit ang ilang numero ug uban pa nga kagamitan sa ilang sim card.

Ang sim card nga wala pa marehistro ug mao kini ang gigamit sa uban nga application posibleng mahanaw kini.

Ang Dakbayan sa Talisay kaniadto nihatag og higayon sa taga telecommunication company nga mobutang og booth diha sa city hall aron maoy moasistar sa mga Talisaynon nga wala pa makarehistro sa ilang sim card.

Ang siyudad nihangyo sa taga Telco gumikan kay adunay lugar nga lisod makakuha og signal, dili kamao magkuri-kuri ang tag-iyia sa cellphone ug uban. BDB (BANATNEWS)