Gullas mogahin og pundo alang sa mga atleta sa Talisay

CEBU, Philippines — Si Talisay City Mayor Gerald Anthony “Samsam” Gullas, Jr. nagtinguha sa paggahin og pundo alang sa pagbansay sa kabataang atleta sa siyudad.

Kini dili lang sa dinalian nga pagbansay sa usa ka kalihokan sa paugnat sa kusog.

Matud sa mayor nga ang pundo alang kini sa tinuig nga pagbansay sa mga atletang kabataan.

Tumong niya nga makadala og medalya ang atletang Talisaynon ilabi na sa Central Visayas Regional Athletic Association (CVIRAA).

Ang Talisay nisalmot sa CVIRAA niadtong niaging mga buwan diin pipila lang sa mga atleta niini ang nakadala og medalya.

Si Gullas gikatakdang makigtigom sa kadagkoan sa Department of Education (DepEd) sa Dakbayan sa Talisay alang sa maong katuyoan aron kapangitaan kini og paagi nga matigayon.

Ang gihimo nga libreng sports clinic ni Gullas usa kini sa paagi nga makita ang talento sa mga kabataan diin mahimo nilang ipadayon diha na sa ilang mga tunghaan aron maoy irepresentar sa siyudad.

Sa laing bahin, pabor si Gullas nga patas-an ang allowance sa mga magtutudlo sa pampublikong tunghaan.

Si Gullas niluwat sa maong pamahayag subay sa pagduso og balaodnon sa Senado alang sa pagsaka sa allowance sa mga magtutudlo nga gikan sa P5,000 ngadto sa P7,500 sa school year 2023-2024.

Ug giingong mosaka pa kini ngadto sa P10 mil sa mosunod nga tuig.

Matud ni Gullas nga dako kini og matabang sa mga magtutudlo sa pagpalambo pa sa ilang pagtudlo ngadto sa mga bata.

Gawas sa madawat nga allowance sa mga magtutudlo sa Talisay gikan sa nasudnong kagamhanan aduna usab sila’y nadawat nga allowance gikan sa siyudad.

Gibutyag ni Gullas nga dugay na sila nga naghatag niini isip suporta sa mga magtutudlo.

Matag quarter sa tuig makadawat og tag P3,000 ang mga magtutudlo gikan sa panudlanan sa siyudad.

Si Konsehal Eduardo “Digul” Gullas III, chairman sa committee on education niuyon usab sa pamahayag sa mayor.

Si Digul nanghinaot nga unta dili madugay ang pag-aproba sa pag-amendar sa balaodnon sa pagpasaka sa allowance sa mga magtutudlo gikan sa panudlanan sa nasudnong kagamhanan. BDB (BANATNEWS)