Kanhi OPAV Dino gipasidunggan sa Cebu City Council

CEBU, Philippines —  Si kanhi Office of the Presidential Assistant for the Visayas (OPAV) Sec. Michael Lloyd Dino maoy  labing una nga personalidad  nga nakadawat sa Order of Rajah Tupas Award dinhi sa Sugbu.

Suma pa ni Bise Mayor Raymond Garcia nga  mao kini ang labing taas nga klase nga pasidungog nga ihatag sa Konseho sa Dakbayan sa Sugbo ngadto sa usa ka indibidwal tungod sa kadako sa natampo niini sa kalamboan sa dakbayan.

Ang paghatag niini kabahin  kini selebrasyon sa Sangguniang Day dili pa lang dugay. Gawas sa Order of Rajah Tupas, gihatagan usab sa konseho sa dakbayan kagabii og pag-ila ang mga nangaging bise mayor sa dakbayan nga buhi pa. Kini sama nila ni  Jose Cuenco, Atty. Augusto Go, Atty. Alvin Garcia, Joy Young, incumbent city mayor Michael Rama, ug Konsehal Dondon Hontiveros.

Gipasidunggan usab sa konseho sa dakbayan ang mga 40 ka kanhi konsehal sa dakbayan gikan sa unang konseho sa dakbayan hangtod sa 2010.

Pipila niini mao ang magtiayong  Atty. Aven Piramide ug Carmen Piramide ingon man usab si Rudy Cabrerra.

Si Garcia miingon nga nagplano usab sila sa paghatag og posthumous awards ngadto sa mga pamilya sa namatay nga mga sakop sa miaging konseho sa dakbayan sa mosunod nga mga tuig.

Ang kanhi mayor nga si anhing Edgardo Labella maoy nagsulat og ordinansa nga nagtakda sa Disyembre 19 matag tuig isip Sanggunian Day sa dakbayan.

“Sanggunian Day is celebrated not only because, Sanggunian as an office and an edifice. Usa usab siya ka  institution whereby the Sanggunian forms or shapes Cebu City to what it is now through its resolutions and ordinances. So, I thought kinahanglan g’yod ni nato i-celebrate ang Sanggunian as an institution through the Sanggunian Day,” matud pa ni Garcia. (BANAT NEWS)