Gullas nakagawas na gikan sa tambalanan

CEBU, Philippines — Nakauli na sa iyang pinuy-anan si Talisay City Mayor Gerald Anthony “Samsam” Gullas, Jr..

Si Gullas nipahibawo niini pinaagi sa iyang Facebook page alang sa transparency sa  estado sa iyang panglawas.

Matud ni Gullas nga iyaha kining gituyo aron kahatagan og katin-awan ang mga Talisaynon diin temporyong wala siya sa mga kalihokan sa siyudad.

Gibutyag ni Gullas nga aduna na siya’y tambal alang sa iyang gagmay nga bato sa kidney nga gipanghinaot matangtang kini pinaagi sa pag-ihi.

Samtang ang infection sa iyang tutunlan daghan nga rason apan naayo ra kini pinaagi sa mga tambal ingon man ang iyang mild pneumonia.

Si Gullas niduso og sick leave gikan naidtong Lunes hangtud karong adlaw diin si Bise Mayor Richard Francis “Choy” Aznar mao ang acting mayor karon.

Samtang ang iyang manghud nga si Konsehal Eduardo “Digul” Gullas III mao ang nangulo sa konseho isip acting vice mayor. (BANAT NEWS)