Esnatser miuli sa iyang kinawat kay nakonsensiya

CEBU, Philippines — Giuli matud pa sa usa ka 29-anyos nga miangkong esnatser ang gilabni niya nga cellphone ug pitaka diha sa dalan Junquera, Barangay San Antonio, Siyudad sa Sugbo pasado alas-2 sa kaadlawon kagahapon, Huwebes, Mayo 16, 2024 kay nakonsensiya pagkakita sa iyahang gibiktima nga naghangos nga gagukod niya.

Ang suspetsado mao si Eduardo Nillas Jr., 29 anyos, residente sa Purok Tamsi, Barangay Balud, Lungsod sa Fernando samtang ang biktima usa ka 21-anyos nga tinun-an nga taga Barangay Bangkal, Dakbayan sa Lapu-Lapu.

Sa impormasyon sa kapulisan Pari-an Police Station sa Cebu City Police Office nga samtang naglakaw ang biktima sa may dalan Junquera giingong kalit lang mibutho ang suspetsado.

Diretso niini nga gilabni ang cellphone ug pitaka sa biktima, apan misukol kini hangtod nga naabot ang mga polis sakay sa mobile patrol ug gidakop ang suspetsado.

Apan ang suspetsado sa iyang bahin miingon nga dihang nakuha niya ang gamit sa biktima nakonsensiya nga sa iyang paglingi naghangos ang biktima nga nigukod niya maong iyahang giuli ng nakuha niya nga pitaka ug cellphone.

Sigon sab sa suspek nga unang higayon niya nga nihimo og pagpanglabni. Matud pa niya mianha lang unta siya sa lugar aron mangita og lugar sa dalan aron adto mohigda.

Nagkanayon ang suspetsado nga nianhi siya sa Cebu City kay gipangita niya ang iyahang kanhi kaipon nga nibiya niya samtang natulog siya niadtong buwan sa Enero ning tuiga.

Gusto matod pa sa suspek nga makaestorya ang iyang kanhi kaipon kun nganong gibiyaan siya niini og kalit. Matud niya, duna silay duha ka anak nga nag-edad 4 ug 2 anyos.

Nangayo og pasaylo ang suspetsado sa biktima niini ug nanghinaot nga dili siya pasakaan og kaso ilabi na nga naa pa siya'y mga anak.  Giangkon sab sa dinakpan nga siya tiggamitan og ginadiling drugas. (BANAT NEWS)