Illegal nga sugal gitutokan sa kapolisan

CEBU, Philippines — Gihingusgan sa kapulisan sa Central Visayas ang ilang operasyon batok sa illegal nga sugal sama sa ilegal nga Swertres nga miresulta sa pagkasikop sa napulo ka tawo apil na niini ang gitumbok nga ilang coordinators.

Nihimo og operasyon batok illegal nga sugal ang Balamban Police Station sa Barangay Baliwagan, Buanoy ug Aliwanay nga pulos sakop sa maong lungsod nga miresulta sa pagdakop upat ka ushers ug usa ka coordinator matod pa.

Samtang ang gitumbok nga coordinators giingong nasakpan kini nga nag-tally og nagkalain-laing illegal number games remittance gikan sa mga ushers.

Nakuha gikan nila ang calculator, notebook gisuwatan og daghang numbero, STL stub, ug uban pang ebidensiya.

Samtang ang kapulisan sa Bantayan Police Station nakadakop sab og babayeng usher sa ilegal swertres.

Samtang ang Criminal Investigation and Detection Group (CIDG) Regional Field Unit nakadakop sab og upat ka tawo nga nalambigit sab gigapon sa ilegal nga swertres.

Nasakmit sa mga operatiba ang mga ebidensiya sama sa bet stub nga dunay mga number combinations, bet money nga lahi-lahi og kantidad, tally bet stub nga dunay nagkadaiyang number combinations, carbon paper, ball pen ug uban pa. 

Samtang arestado sa buy-bust operation sa City Intelligence Unit sa Cebu City Police Office (CCPO) sa miaging adlaw sa Sitio San Miguel, Barangay Apas, Siyudad sa Sugbo ang usa ka alyas Winggol, 37, tungod sa pagpamaligya og ilegal nga drugas.

Nakuhaan ang suspetsado og 50 gramos sa gituohang shabu nga nagkantidad og P340,000, buy-bust money ug uban pa. (BANAT NEWS)