Pabrika og plastic nasunog, P17.5 milyones ang danyus

CEBU, Philippines — Mokabat sa P17.5 milyones ang kantidad sa gibilin nga danyos sa nahitabong sunog sa Marscel Manufacturing, usa ka pabrika sa plastic nga nahimutang sa District 1 sa Barangay Pulpogan Lungsod sa Consolacion.

Kini gialarma sa kabomberohan alas 5:45 niadtong Miyerkules sa hapon, Mayo 15, 2024 nga gipaubos sa first alarm hangtud na ngadto sa third alarm. Si Fire Officer 2 Jaypee Ango, field investigator sa Consolacion Fire Station miingon nga lakip usab sa nasunog ang bodega sa maong pabrika nga gihimong pundohanan sa mga finish product niini.

Dugang pa ni FO2 Ango nga ang one-storey building nga nahimutangan sa maong pabrika sa plastik gipanag-iya ni Mark Anthony Dy.

Nasuta nga usa sa mga trabahante niini nga si Tony Robrero, 21 anyos nga nagpuyo usab sa maong dapit ang naangol ug nakaangkon og mga paso sa iyang lawas.

Matud pa ni FO2 Ango nga ilang gipaubos sa third alarm ang maong sunog alas 6:18 ang takna sa gabii nga maoy hinungdan sa pagtubag usab sa uban nga mga kabomberohan sa Sugbo nga mitabang sa pagpawong sa kayo.

Wa pa matino sa kabomberohan ang hinungdan sa kalit nga pag-ulbo sa kayo sa pabrika tungod kay mohimo pa sila og dugang imbestigasyon sa maong insidente. (BANAT NEWS)