Mga mayor ug brgy captains misuporta ni Rama

CEBU, Philippines — Dugang mga mayor sa nagkalain-laing lugar sa nasud ingon man mga barangay captains ang mipadayag og suporta ngadto kang mayor Michael Rama nonot sa preventive suspension nga gipahamtang sa Ombudsman Visayas.

Una niini si Quezon City Mayor Belmonte kinsa mao ang League of Cities of the Philippines Executive Vice-president ang mipadangat og suporta kang Rama.

Kagahapon nakakuha ang The Freeman og kopya sa mga statement of support alang kang Mayor Rama nga gikan nila ni mayor Baby Arni Alvarez sa Munoz, Carmen Geraldine Rosal sa Legazpi, ug Jerry Trenas sa Iloilo City.

Sila nagtuo nga si Rama usa ka maayong amahan sa dakbayan sa Sugbo ug adunay tinud-anay nga serbisyo alang sa publiko. 

Samtang ang mga kapitan nga mipadayag og suporta ni Rama mao ang mga barangay kapitan sa barangay Busay, Hipodromo, Carreta, T.Padilla, Tejero, San Roque, Ermita, Lusaran, Cambinocot, Calamba, Buhisan, Kalunasan, Labangon, Kinasang-an, Duljo-Fatima, Mambaling, Bonbon, Malubog, Busay, Guba, Guadalupe, Sinsin, Capitol Site, Adlaon, Poblacion Pardo, Quiot, Sudlon 2, Tabunan, Tisa, Sapangdaku, Sudlon 1, Cogon Pardo ug Pasil.

Ang Barangay Councilors’ League nga gipanguluhan sa ilang president nga si Dante Tabucal ang mipadangat usab og lahi nga statement of support ngadto kang Rama.

Samtang si Rama, niingon nga “coping” ra siya sa iyang sitwasyon.

Sa usa online interview sa page nga gidumala sa Cebu City Information Office, kagahapon (Huwebes), Mayo 16, 2024, gibutyag ni Rama nga sa pagkakaron “nangandam” siya alang sa pipila ka mga kalihokan.

Sa pangutana kun nganong nipatim-aw pa ang suspendidong mayor sa usa ka plataporma nga gidumala sa Cebu City Government, nga mao ang Sugboanon Channel, giklaro ni Rama nga ang maong social media page gilusad aron mahimong avenue ni bisan kinsa nga mupahayag sa “kamatuoran”.

Matud pa ni Rama, nagtutok siya sa iyang “propesiya” nga gisulat sa usa ka papel nga iyang gipakita atol sa pakighinabi.

Dugang pa niya nga aron maka “cope up”, sugdan niya ang iyang adlaw sa usa ka "pag-ampo". ug gigamit niya karon ang panahon uban sa iyang pamilya nga alang kaniya igo na nga “productive”.

Samtang nagpasalamat usab si Rama sa pagpakita sa suporta sa League of Cities ug sa mga Barangay Kapitan sa dakbayan sa Sugbo ngadto kaniya.

Si Rama ug laing pito ka opisyal sa city hall gipahamtangan og unom ka buwan nga preventive suspension sa Office of the Ombudsman tungod sa kasong gipasaka sa upat ka mga empleyado nga wala mabayri sa ilang sweldo sulod sa napulo ka buwan. (BANAT NEWS)