Istatuwa ni Lapu-Lapu ipabarug sa sunod National Heroes Day
CEBU, Philippines — Si Cebu City Michael Rama nimando nga kon ang siyudad mo selebrar pag-usab sa National Heroes Day aduna nay istatuwa sa national hero nga si Lapu-Lapu diha sa Plaza Sugbo grounds duol sa Cebu City Hall.
Kini maoy gisulti ni Rama samtang nag-recite sa pledge of commitment alang sa Singapore like Cebu City ngadto sa mga nitambong sa kalihokan sa National Heroes Day niadtong Lunes.
Gipadayag ni Rama ang mahitungod sa pagpabarog og istatuwa ni Lapu-Lapu human ang LED wall background display alang sa kalihokan nagpakita sa nagkalain-laing bayani apan wala makita si Lapu-Lapu.
“Next year Lapu-Lapu should be there. Depende kinsay taas, Rizal ba or Lapu-Lapu”, ni Rama pa.
Si Bise Mayor Raymond Alvin Garcia sa iyang bahin, nipaniguro nga sa sunod nga National Heroes Day celebration mahatagan og importansiya si Lapu-Lapu.
“Definitely ato gyud tong sundon nga sa atong next National Heroes Day ato gyung ipaatubangan si Lapu-Lapu. And I think he also mentioned magbutang gyud ta og istatuwa. That is something that CHAO (Cultural and Historical Affairs Office) and CHAC will work nga mabutangan nato diri sa atong Plaza Sugbo grounds”, matud ni Garcia.
Ang pangulo sa CHAO Bryner Diaz nagkanayon nga ang pagpabarug og istatuwa ni Lapu-Lapu sa Plaza Sugbo alang sa sunod tuig nga National Heroes Day mahimo pinaagi sa tabang sa Knights of Rizal civic organization.
“Daghan kaayong mga chapters sa Knights of Rizal nga mo-volunteer nga unsay kinahanglanon sa Cebu motabang sila. So ang monument ni Lapu-Lapu og naa na siya’y lugar naa na siya’y design pwede kaayo sila’y mohimo, sila’y mo spearhead sa construction sa pagpangita og funds para ana. Tukoron nila, ang city mo-unveil”, ni Diaz pa. —BDB (BANATNEWS)
- Latest
