Pag-amendar sa ordinansa nga naghatag og libreng lungon giduso

CEBU, Philippines — Niduso og ordinansahon si Cebu City South District Councilor Jocelyn Pesquera nga mag-amendar sa section 2 ug 7 sa City Ordinance No. 1131 nga nailhan usab nga "Free Paupers/Indigents' Coffin Ordinance."

Sa maong lakang, bisan sa wala pa mapasar ang Local Government Code of 1991, giatiman na sa kagamhanan sa dakbayan sa Sugbo ang ilang mga konstituwente pinaagi sa pagtabang kanila ilabi na panahon sa personal nga krisis sama sa kamatayon sa sakop sa pamilya.

Base sa unod niini, gikinahanglan nga i- update na ang kantidad sa hinabang.

Sama sa gihatag sa proposed amendment sa Section 2 sa CO 1131, aron mahatagan og puwersa ug epekto kining maong socially oriented ordinance, ang kagamhanan sa dakbayan mohatag og libreng lungon nga dili mosobra sa P10,000 ang kantidad sa matag namatay nga ma-classify nga kabus.

Sa laing bahin, alang sa pag-amendar sa seksyon 7, ang kantidad nga P2 milyon ang gigahin aron mabayran ang mga galastuhan nga gikinahanglan aron mahatagan og epekto ang ordinansa.

Dugang unod niini mao ang paghatag og gahum sa mayor sa siyudad sa pagpangayo og materyal  o tabang pinansyal  sa bisan unsang gigikanan aron  madugangan ang pondo nga gigahin alang sa maong katuyoan.

Ang mga kwalipikado nga benepisyaryo sa ordinansa mao ang usa ka pobre/indigent nga tawo nga residente sa Cebu City nga nagpuyo sa siyudad sulod sa labing menos lima ka bulan sa wala pa siya mamatay.

Ang gisugyot nga amendment ordinance gi-refer ngadto sa Committee on Laws, Ordinances, and Styling; Committee on Budget and Finance; ug Committee on Social Services alang sa dugang pagtuon. —MEL (BANAT NEWS)