Drainage master plan sa Cebu nabalda

CEBU, Philippines — Moabot sa P1.2 billion gikan sa P8 bilyones ang gigahin sa nasudnong kagamhanan alang sa drainage master plan sa Cebu ang nagamit. Apan dakong hagit kanila ang informal settlers daplin sa kasapaan.

Kini ubos sa flood control program sa Dakbayan sa Sugbo diin gitutukan ang pagpalapad ug pagpalawom apil na ang pagbutang og riprap sa kilid sa mga sapa.

Matud ni Konsehal Jerry Guardo, Chairman sa Committee on Infrastructure nga apil sa proyekto ang upat ka sapa sa siyudad sa Sugbo ug usa sa dakbayan sa Mandaue.

Gilangkuban sa Lahug River, Guadalupe River, Bulacao River ug Butuanon River sa Mandaue City. 

Gitug-an ni  Guardo nga babag sa proyekto ang mga informal settlers nga nasakop sa three meter easement sa kasapaan hinoon gipangitaan nila kini og pamaagi.

“As I said we offer them two options, ang katong financial assistance nga 35 and then ang katong relocation site ang katong MRB, ang atong MRB will be available na siya, we’re finalizing lang sa guidelines kinsa gyud ang mga qualified beneficiaries but ato gyud gihatagan og priority ang mga affected”, matud ni Guardo.

Sa pikas bahin, higpit na ang pagpangandam sa kagamhanan sa Siyudad sa Mandaue ang pagsulod na sa panahon nga masinati ang kanunay nga pagbunok sa ulan.

Gipaspasan nila karon ang paglimpjyo sa kasapaan ug paghawan sa mga estraktura nga makabalda sa dagayday sa tubig nga maoy hinungdan sa masinati mga pagbaha.

Si Atty. John Eddu Ibanez, executive secretary ni Mayor Jonas Cortes miingon nga naglakip sa mga dapit nga ilang gihawanan mao ang Butuanon River diin 50 tonelada nga basura ang nakuha sa bagohay lang gihimong coastal cleanup.

Samtang gipahigayon usab sa mga personnel sa Housing Urban Development Office (HUDO) ang clearing operation  sa luna sa Barangay Subangdaku nga giokupar sa Malibu Matimco Village Home Owners Association Inc.

Pagpangandam kini sa pagpalapad sa dalan ug kauagmaran sa drainage project sa maong lugar. – Romeo T. Limpangog/IBM (BANATNEWS)