Mga polis ipakatap atol sa Bar Exam diha sa USJR Basak Campus

CEBU, Philippines — Mokabat sa 102 ka polis ang i-deploy sa Cebu City Police Office (CCPO) aron seguruhon ang kaluwasan sa mga examinee ug personnel sa University of San Jose-Recoletos (USJ-R) Basak Campus sa pagsugod sa 2026 Bar Examinations karong Domingo, Septiyembre 6.

Magsugod alas 4 sa kadlawon ang deployment sa mga polis aron inspeksiyunon ang sulod ug gawas sa testing center, uban sa koordinasyon sa Office of the Judiciary Marshals sa Supreme Court (SC).

Apil sa security contingent ang mga personnel gikan sa Explosive Ordnance Disposal (EOD) team, Quick Reaction Team (QRT), Special Weapons and Tactics (SWAT) ug intelligence units.

Gilauman nga mokabat sa 1,200 hangtud 1,300 ka examinees ang mo-take sa Bar Exams sa USJ-R Basak Campus, nga mao lamang ang local testing center (LTC) sa Cebu nga gitudlo sa Supreme Court.

Ang eksaminasyon himuon sulod sa tulo ka adlaw, Septiyembre 6, 9 ug 13.

Motabang usab ang ubang opisina sa Cebu City Government pinaagi sa paghatag og personnel ug kagamitan atol sa eksaminasyon.

Ang City Transportation Office maoy magdumala sa trapiko sa Natalio Bacalso Ave., samtang mag-deploy og ambulansiya ang Cebu City Disaster Risk Reduction and Management Office ug magpaandam og fire truck ang Bureau of Fire Protection.

Ipatuman usab ang noise restriction ug liquor ban sulod sa 100-meter radius sa testing center sugod alas 12:01 sa kadlawon sa Domingo hangtod sa gabii human makagawas ang mga examinee. Ang samang security measures ug restrictions ipatuman sa mosunod nga mga adlaw sa eksaminasyon.

Gipaabot sa kapolisan ang mas daghang tawo sa palibot sa testing center sa kataposang adlaw tungod sa gilauman nga pag-abot sa mga paryente, ug mga higala sa mga examinee. (BANAT NEWS)