Malungtaron nga solusyon sa basura layo pa sa katumanan

CEBU, Philippines — Wala pay nakita nga malungtarong solusyon ang Kagamhanan sa Dakbayan sa Sugbo alang sa pagdumala sa basura sa siyudad bisan pa man sa paghuman sa pasiunang ocular inspection nga gipahigayon sa konseho niadtong Septiyembre 2, 2026 sa Prime Integrated Waste Solutions Inc. sa Barangay Binaliw.

Ang inspeksyon gihimo human gipasar sa konseho ang resolusyon nga nagtugot sa mga konsehal sa pagsusi sa mga pasilidad nga posibleng modawat sa basura sa dakbayan.

Matud pa ni Konsehal Joel Garganera kinsa tsirman sa Committee on Environment, wala pa gyud makab-ot sa siyudad ang usa ka malungtarong solusyon sa basura kapin usa ka tuig na sukad gisalikway sa siyudad ang waste-to-energy nga proyekto nga tukuron unta sa Barangay Guba.

Gibutyag ni Garganera nga si Mayor Nestor Archival mismo ang wala niuyon sa proyekto.

“The made it real nga he is very much against it. Kami ganahan mi ana, but, it will be an investor's nightmare to invest in an LGU where the mayor is a critic of such technology. So, it's like throwing good money over bad,” padayag pa ni Garganera.

Gilauman nga ang waste-to-energy mahimong usa sa mga solusyon sa problema sa basura apan wala kini madayon tungod kay nibalibad na sab ang NewSky Energy.

Samtang giila ni Garganera nga maayong pamaagi ang waste segregation ug recycling nga gipasigudahan sa administrasyon ni Mayor Nestor Archival, apan pabilin niya nga giawhag ang mayor nga mangita gihapon og laing mga solusyon.

Matud pa ni Garganera nga dili masulbad sa segregation ug recycling ang tibuok problema tungod sa kadaghan sa basura.

Wala pa usay klarong desisyon gikan sa PIWSI kon unsa ang ilang tukmang plano alang sa maong pasilidad.

Nisugyot si Garganera sa posibilidad nga magtukod og pasilidad alang sa waste-to-energy tungod kay nakita niya nga haom ang kadako sa luna sa PIWsi.

Apan ang kompanya naghuwat pa sa desisyon ug plano sa ilang mga labaw nga opisyales.

Sa habig ni Konsehal Harry Eran, gipahinumduman niya si Mayor Archival bahin sa panginahanglan sa siyudad nga gawas sa waste segregation, mangita og teknolohiya ug pasilidad nga makatubag sa pagproseso sa daghang mga basura.

Gitan-aw sa konseho ang pyrolysis nga unang gisugyot ni Bise Mayor Tomas Osmeña isip posibleng teknolohiya sa pagproseso sa basura.

Apan hangtud karon, matud ni Eran, wala pa’y konkreto nga sugyot nga mahimong susihon sa konseho aron matino kung unsaon pagpatuman sa teknolohiya. (BANAT NEWS)