Mga establisamento sa Cebu City tugotan na sa maximum capacity
CEBU, Philippines — Ang Emergency Operation Center Cebu City nipahibawo kagahapon nga ang mga establisamento tugotan na nga maka-operate base sa ilang 100 porsyento nga kapasidad.
Si Konsehal Joel Garganera, hepe sa EOC nagkanayon nga sa alert level 2 gitugot lang ang 70 porsyento nga kapasidad apan karon nga ubos na sa alert level 1 ang siyudad pwede na ang maximum capacity.
Ang mga tag-iya sa establisamento giawhag usab nga mag-umol og palisiya diin mag-self regulate kini sa ilang operasyon.
Apan bisan og nilugak na ang quarantine restrictions sa Cebu City ang kadagkoan sa siyudad nagpahinumdom gihapon sa katawhan nga kanunay’ng mag-obserbar sa health protocols.
Nasayran kagahapon nga si Mayor Michael Rama nagpahigayon og closed door nga tigom aron pagtuki sa measures nga ipatuman karon nga alert level 1 na ang Cebu City.
Apan matud ni Rama nga dili gyud mokompiyansa ug magmatngon lang gihapon.
Nunot niini, upat ka mga rekisitos sa metrics sa Inter-Agency Task Force ang gigamit aron maubos ang alert level sa usa ka lugar.
Si Dr. Mary Jean Loreche, chief pathologist sa Department of Health-7 nagkanayon nga gilangkuban kini sa case load, capacity utilization rate, fully vaccinated, 70 porsyento sa total eligible vaccination ug 80 porsyento sa fully vaccinated senior A2.
Dugang ni Loreche nga ang Lapu-Lapu City naka-satisfied sa tulo ka rekisitos apan nagkulang sila sa A2, ang Mandaue City naka-satisfied usab sa tulo ka rekisitos ug alang sa data reconciliation pa sa A2 ug malaumon nga kini makonsiderar samtang sa Cebu Province naka-satisfied sa rekisistos 1 ug 2 apan kinahanglan pa nga trabahuon ang number 3 ug 4 nga rekisitos aron sila moubos ngadto sa alert level 1. —Rowena D. Capistrano/BDB (BANATNEWS)
- Latest
