Pagpakatap og tarpaulin ni Bise Mayor Bucao gi-kwestyon

CEBU, Philippines — Naukay ang mga netizen sa social media sa post sa usa ka biker nga nagkwestiyon sa intensyon ni bise mayor Alan Bucao sa pagbutang og tarpaulin nga dunay pahimangno alang sa mga bikers.

Si John Rabz Ortiz ni-post og hulagway sa tarpaulin nga adunay mga impormasyon labot sa kaayohan sa pagbisikleta.

Gipadayag ni Ortiz ang pangutana kun nganong ang pangalan ni Bise mayor Bucao ug sa iyang asawa ang nabutang ug wala malakip ang ubang konsehales.

Hinoon naapil ang pangan ni Mayor Gerald Anthony “Samsam” Gullas apan ang dagway ni Bucao mao ang makita sa maong tarpaulin.

Samtang namatikdan usab ni Ortiz nga ang maong mga tarpaulin gipakatap sa lain laing lugar sa Talisay.

Pipila sa mga kapitan ang gipangutana labot niini apan nihangyo nga dili mokomentaryo samtang nagpakahilum lang usab ang mga konsehales.

Sa iyang bahin, si Bucao nitubag sa post ni Ortiz ug nipasabot nga pila na ka buwan nila nga giplano ang pagbutang sa maong mga tarpaulin uban ni konsehal Bucao isip maoy chairman sa committee on tourism.

Matud pa niya nga nabutang kini sa wala pa siya makalingkod isip acting mayor sa siyudad human nagpositibo sa COVID-19 si Mayor Gullas.

“Pls be informed also Sir, not a single centavo was taken from the government`s coffer of Talisay. All expenses paid by Globe Telecom as part of their Corporate Social Responsibility (CSR),” tipik sa tubag ni Bucao.

Dugang pa niya nga wala sab siya makadawat og commission gikan sa pribadong kompaniya. —MEL (BANATNEWS)