Kadaghanan sa 116 violators nakalapas sa curfew—Parilla
CEBU, Philippines — Kapulisan sa Dakbayan sa Sugbo, nakadakop og 116 ka mga quarantine violators niadtong Miyerkules matud ni Deputy Director for Operations Police Lt. Col. Wilbert Parilla.
Matud pa ni Parilla napulo niini nasikop tungod kay walay facemask samtang ang uban tungod sa curfew. Giangkon niya nga nikunhod na hinuon karon ang mga malapason kun itandi sa nakalabay nga mga adaw.
Sa pikas bahin, 29 ka tawo sab ang nadakpan sa kapulisan sa Dakbayan sa Talisay tungod gihapon sa samang kalapasan matud pang Police Lt. Roberto Barnido Jr. kinsa milusad og operasyon batok sa mga malapason sa guidelines sa IATF.
Si Police Lt. Col. Gerard Ace Pelare, pangu sa Talisay City Police Station miingon nga estrikto sila pagbalik kay nakita nga nisaka nasab ang kaso sa Covid-19 sa siyudad.
Ang nasikop gidala sa Tapul Holding Facility samtang giandam ang kaso nga ilang ipasaka. Matud pa ni Pelare nga hangtud karon wala pa gyud sila milugak sa pagpatuman sa mga health protocols tungod sa padayon nga pandemya.
Sa samang kalamboan, si Lapu-Lapu City Mayor Junard “Ahong” Chan mipasabot nga dili pangwarta ang tumong sa lapad nga operasyon pagpanakop sa mga malapason sa health protocols.
Sumala pa sa mayor, isip amahan sa siyudad gusto lang niyang madisiplina ang mga Oponganon aron maprotihian sila batok sa Covid-19 kay di niya buot mabalik ang nahitabo sa miaging tuig. – Gabriel Bonjoc/IBM (BANATNEWS)
- Latest
