P6.4 milyones shabu nasakmit, jo sa talisay sikop
CEBU, Philippines — Mokabat sa P6.4 milyones ang balor sa ginadili nga drugas nga nasakmit sa mga sakop sa City Intelligence Unit sa buy-bust operation sa may Sitio Garfield, Barangay Suba, Dakbayan sa Sugbo alas 11 pasado niadtong Martes sa gabii.
Ang nasikop naila nga sila si Marvin Enriquez, 38, ulitawo, taga Barangay Suba ug Jason Cabellon, 35, minyo, taga San Jose Village, Barangay Tisa.
Nangulo sa maong operasyon mao si Police Major Randy Caballes ubos sa pagsuperbisar ni Police Col. Josefino Ligan, director sa Cebu City Police Office uban sa pagpakig-alayon sa Philippine Drug Enforcement Agency 7.
Nasakmit gikan sa mga dinakpan ang 937.6 gramos sa gituohang shabu nga mobalor og P6,375,680.
Ang mga dinakpan giingong makadispatsar og tulo ka kilo matag semana ug makadawat og P25,000 matag hatud nila sa ginadili nga drugas.
Samtang lima ka durugista ang nasikop sa buy-bust operation sa mga sakop sa Provincial Intelligence Branch sa Sitio Ranger 1, Barangay Pooc, Dakbayan sa Talisay niadtong Martes sa hapon.
Lakip sa nadakpan ang job order nga kawani sa Talisay City Hall nga si Arvi Lastimosa, 35-anyos.
Una niini, nadakpan si Allan Bacalso alyas Antoy, 26, maoy subject sa operasyon, samtang naabtan ang iyang mga kauban nga sila si Lastimosa, Raniel Fernandez, 23; Jake Beduya, 32, ug Churchelle Gomez, 30.
Ang mga operatiba nakigsabot ni Bacalso sa pagpalit og ilegal nga drugas. Wala magdugay nikagat si Bacalso hangtud nga nahitabo ang dinakpanay.
Nakuha gikan sa mga dinakpan ang ilegal nga drugas nga nitimbang og 6 gramos nga adunay balor nga P40,800.
Ang mga dinakpan gibalhug na sa bilanggoan ug gikatakdang pasakaan sa tukmang kaso. Gabriel C. Bonjoc/GMR (BANATNEWS)
- Latest
