Nagkagamay ang kaso sa Cebu City; Apan kaso sa probinsya nagkadaghan

CEBU, Philippines — Kagahapong adlawa Hunyo 23, ang pinakaubos nga natalang nadugang sa mga kaso sa coronavirus disease (COVID)-2019 sa Dakbayan sa Sugbo sukad gipaubos pagbalik sa Enhanced Community Quarantine (ECQ) ang dakbayan.

Base sa datos nga gipagawas sa Cebu City Health Department, 30 ka mga kumpirmadong kaso ang natala kagahapong adlawa.

Ang mga kaso gikan sa Barangay Mabolo 1, Mambaling 2, Pahina Central 1, Pardo 1, Pasil 2, Punta Princesa 2, Quiot 4, Sambag-1 7, Sambag-2 5, Suba 1, Tejero 1, Tinago 1, ug Tisa 2.

Samtang maayong balita sab tungod kay kagahapong adlawa 31 kabuok ang  naka-recover sa COVID-19 nga gikan sa Barangay Labangon.

Apan nadugangan hinuon ang mga nakalas, human pito ang nakalas gikan sa Basak San Nicolas 1, Duljo Fatima 1, Labangon 1, Mambaling 1, Tejero 1, ug Tisa 2.

Samtang anaa na sab sa 503 ang active cases sa COVID-19 sa Probinsya sa Sugbo sa Hunyo 23, 2020. Atol sa virtual presser kagahapon si Cebu Governor Gwendolyn Garcia, sa mga aktibong kaso ang 126 niini ang anaa sa hospital.

Samtang 110 ang adunay sintomas ug 267 ang walay sintomas nga anaa sa home isolation ug quarantine facility.

Niabot na usab sa 166 ang nakarecover na sa coronavirus disease (COVID-19). Ang mga namatay, niabot sa 61 apan 48 niini ang incidental lang nga COVID-19 positive ug aduna na daan sakit samtang 13 ang COVID-related ang gikamatyan.

Niadtong adlaw nga Lunes, ang probinsya nakatala og 440 ka mga kaso, nagpasabot nga 60 ang bag-ong kasong natala sa lalawigan.

Tungod niini, si Garcia mimando nga estriktuhon pagbalik ang border control sa Probinsya sa Sugbo ug sa Dakbayan sa Sugbo. l.

“Effective Friday (June 26, 2020) we will have to revert to strict border controls, wala na ko magpatawag sa meeting sa tanang mga mayor it’s too big a task nga mag meeting na pud ta just to agree on this. I am deciding this now,” pagpahibalo ni Garcia.

“I know this is going to be a burden to some of our mayors but we will have to do this in order to curve the increase of cases ever since atong gi-open up, atong gi loosen atong restrictions. So this will be effective Friday,” dugang sa gobernador. Le Phyllis Antojado/IBM (BANATNEWS)