Zafra: Gikinahanglan ang dugang pipelines alang sa supply sa tubig

CEBU, Philippines — Gikinahanglan ang dugang pipelines nga ipahimutang diha sa kabukiran aron mapaabot ang supply sa tubig ngadto sa mga sitio.

Kini ang gitug-an ni Konsehal Phillip Zafra human sa ilahang pagbisita diha sa mga bukirang lugar subay sa kamandoan ni Mayor Edgardo Labella uban ang taga City Resource Management and Development Center (CREMDEC) ug representante sa National Irrigation Administration (NIA).

Matud ni Zafra nga nihimo sila og pakisusi sa mga water sources sa bukiran nga barangay, diin adunay sitio nga agas karong adlawa ang tubig apan sunod adlaw walay agas tungod kay lain na usab nga area ang paagasan ilabi na kadtong lugar nga giserbisyohan sa NIA.

Base sa mga pamahayag sa pipila ka mga kapitan adunay mga tubod nga nihinay na usab og agas ang tubig.

Ug tungod sa maong report ang grupo ni Zafra gitahasan ni Labella sa pagsusi sa mga water system diha sa kabukiran.

Gitug-an ni Zafra nga pipila ka mga bukirang lugar nga ilang nabisita aduna silay mga nakita nga nibuto nga water pipeline nga nakaapektar sa ubang lugar diin wala kini supply sa tubig sa pagkakaron.

Dugang ni Zafra nga kinahanglan magbutang og dugang pipelines aron ang mga sitio diha mga bukirang lugar ang maabtan og tubig.

Ug giingong nagkinahanglan usab og dugang high powered pumps, tangke sa tubig ug drums, mga hose ug uban pa. /BDB (BANATNEWS)

Sitio Tinabangay, Mambaling nahatagan na og hinabang

Rowena D. Capistrano

CEBU, Philippines — Ang Barangay Mambaling, Dakbayan sa Sugbo nakahatag na kini og hinabang diha sa Sitio Tinabangay diin ang maong lugar nga sakop sa nahisgutang barangay gipaubos karon sa lock-down human giingong adunay nagpositibo sa covid-19.

Si Konsehal Seller Salvador nibutyag sa Banat News nga nihangyo na siya kang Kapitan Gines Abellana nga mahatagan og bugas ug delata ang mga apektado sa lockdown.

Matud ni Salvador nga daling nitubag sa iyang hangyo si Abellana.

Niadtong Huwebes sa gabii ang barangay nag-apod-apod dayon og hinabang sa mga residente sa maong sitio ug gitiwas nila niadtong Biyernes ang pagpang-apod-apod.

Ang mga opisyal sa barangay nihangyo kini sa katawhan nga dili lang una mogawas sa ilang mga balay.

Gibutyag ni Salvador nga adunay nagbantay sa lugar ug gi-cordon na kini. /BDB (BANATNEWS)