Total lockdown ang Barangay Labangon

CEBU, Philippines — Hingpit na nga ipatuman ang total lockdown sa Barangay Labangon, Dakbayan sa Sugbo sugod karong adlawa. Matud ni Kapitan Victor Buendia nga wala nay bisan kinsa nga makagawas sa iyang barangay kung walay mga importante nga tuyo ug lakaw sama sa pagpamalit og mga basic goods, adunay emergency o kaha mga frontliners.

Sumala pa ni Buendia nga wala na sab silay tugotan nga dili mga residente sa Barangay Labangon nga makasulod gawas sa magdala og basic goods ug lakip ang mga frontliners.

Giklaro ni Buendia nga kadto adunay mga importante nga mga lakaw nga mogawas sa ilang barangay segurohon sab nila nga i-disinfect sila una mosulod pagbalik sa barangay.

Dugang pa ni Buendia nga sa pagkakaron ilang gibantayan ug giatiman ang ilang merkado nga dili masudlan sa maong sakit nga COVID-19 aron dili maguba ang ilang mga kalihukan.

Gitug-an sa kapitan nga sa pagkakaron nagkinahanglan gyud sila og mga personal protective equipment alang sa mga frontliners ug lakip usab ang relief goods para sa mga residente.

Gipahibawo ni Buendia nga pito ka tawo gikan sa Sitio Callejon ang gibalhin nila ngadto sa isolation room nga anaa sa Labangon Elementary School kagahapon samtang ang 15 karong adlawa. /GMR (BANATNEWS)