Nagtabanog, bata nakuryentihan

CEBU, Philippines — Nalandig sa tambalanan ang usa ka 11-anyos nga batang lalaki human gikatahong nakuryentihan pagkuhit niini sa nasangit nga tabanog diha sa dalan Cabantan sa Barangay Luz sa Dakbayan sa Sugbo.

Matud ni Mabolo Police Station Chief Police Major Dindo Alaras nga nagdula ang bata sulod sa ilang panimalay ug gikan sa terrace sa ilang ikatulong andana nagpalupad kini sa iyang tabanog.

Si Barangay Luz Kapitan Ronnie Sab-a  miila sa bata nga si Kian Troy Espinosa nga nagpuyo sa maong dapit.

Sumala pang Alaras base sa nakuha nilang pasiunang impormasyon nasangit sa main line sa kuryente ang tabanog ug mibuto ang transformer sa lugar hinungdan nga nag-brownout sa tibuok barangay.

Dugang pa ni Alaras nga nakalitan nalang ang mga silingan tungod kay human sa pagbuto nahulog ang bata sa ubos nga nasunog ang nawong ug ang lawas niini.

Ang bata daling gitabang sa mga tawo ug gidala sa mga fire volunteers sa barangay ngadto sa Vicente Sotto Memorial Medical Center ug gikatahong talandugon ang kahimtang. Nagtuo si Alaras nga tungod sa gipatumang total barangay lockdown sa Barangay Luz gumikan sa 83 na karon nga positibo sa coronavirus COVID-19  ang bata nangita og paagi aron malingaw pinaagi sa pagtabanog gikan sa ilang balay apan nakuryentihan hinuon kini. Subling gipahinumdoman ang publiko nga gidili ang pagtabanog tungod sa kadako sa posibilidad nga masangit ang tanod sa linya sa kuryente ug makuryentihan ang nagduwa niini.. /IBM (BANATNEWS)