100,000 ka sakong bugas iapod-apod sa mga apektado sa COVID-19

CEBU, Philippines — Si Cebu City Mayor Edgardo Labella nibutyag nga nagpalit sila og 100,000 ka sakong bugas nga ipang-apod-apod ngadto sa mga “less privilege member” sa katilingban ilabi na sa mga ‘no work, no pay’ ug walay saktong trabaho.

Matud ni Labella nga tungod sa restrictions nga gipatuman batok sa covid-19 daghan ang nawad-an sa inadlaw nga panginabuhian.

Tumong sa siyudad sa pagpamalit og mga bugas aron mahatagan og ayuda ang mga nanginahanglan.

Ang mga kapitan sa 80 ka barangay gipatawag ni Labella karong adlawa lakip na ang Mayor’s Information and Liaison Officers (MILO).

Gikatakdang tukion sa maong tigom ang kabahin sa pamaagi sa pagpanghatag sa bugas aron madawat gyud kini sa mga nagkinahanglan.

Nasayran nga duna nay supplier nga nakit-an ang kagamhanan sa siyudad alang sa 100,000 ka sakong bugas ug maandam na kini sulod niining semanaha.

Giklaro usab ni Labella nga dili nila gusto nga dugayon ang pagpanghatag sa bugas hinungdan nga gipatawag dayon niya ang mga kapitan ug MILO aron mag-usa sa pag-umol og pamaagi sa epektibong pag-distribute sa mga bugas. /BDB (BANATNEWS)