Police assistance desks ipahimutang sa Basilica

CEBU, Philippines — Mopahimutang og mga police assistance desk ang kapolisan sa Dakbayan sa Sugbo aron adunay kadangpan ang katawhan kung adunay kakulian atol sa kapistahan sa Senyor Santo Niño.

Matud ni Cebu City Police Office Director, Col. Engelbert Soriano, nga ang mga police assistance desk ibutang sa tanang area ilabi na sa sulod ug gawas sa Basilica Minore del Santo Niño nga dali maduolan sa katawhan.

Adunay mga police ug volunteers nga kahibawo na unsay buhatan sa higayon nga adunay magpakitabang sa help desk ug mao ang molabay sa impormasyon ngadto sa multi-agency coordinating center.

Gitug-an ni Soriano nga gibana-bana nila nga kapin sa 300 ka polis ang ipakatap sulod ug gawas sa Basilica apan hayan duagangan pa kini tungod sa volume sa mga tawo nga moabot sa simbahan.

Ang CCPO nakig-alayon sa tanang ahensya sa kagamhanan ug law enforcement agencies alang sa hapsay ug malinawon nga pagpatuman sa mga kalihukan sa Fiesta Señor.

Gatusan ka sakop sa law enforcement agencies ingon man mga sakop sa Cebu City Disaster Risk Reduction and Management Office ang nitambong sa Task Force Sinulog 2020 send-off ceremony kagahapon.

Kini gipahigayon atubangan sa Plaza Sugbo diin usa ka Santos nga Misa ang gipangulohan ni Fr. Pacifico Nohara Jr, OSA, Rector sa Basilica Minore del Santo Niño ug gitambongan sa kaparian sa Archdiocese of Cebu uban usab ang mga opisyal sa kagamhanan, kapolisan, militar, kabomberohan, Coast Guard, Navy ug uban pa.

Nitambong sab sila si Cebu City Mayor Edgardo Labella ug Police Regional Office 7 Director, Police Brigadier General Valeriano de Leon.

Human sa Santos nga Misa gisunod dayon ang blessing sa tanang law enforcement agencies nga moserbisyo alang sa Fiesta Senyor.  GMR (BANATNEWS)