Daanbantayan kinahanglan pa og dugang hinabang

CEBU, Philippines — Mga relief assistance alang sa mga biktima sa bagyong Ursula sa Lungsod sa Daanbantayan ang nagkuwang pa gihapon.

Si Mayor Sun Shimura sa iyang facebook post niadtong Disyembre 29, 2019 nagkanayon nga nikabat sa 19,000 ka panimalay ang naapektohan sa bagyong Ursula.

Ang Department of Social Welfare and Development nagpadala na og 8,000 ka food packs samtang 4,000 usab ang gikan sa Local Government Unit.

Apan ang maong mga hinabang giingong dili kini paigo sa gidaghanon sa mga naapektohan sa bagyo

“So ayaw lang sab dayon mo og react kong giuna ang totally damaged, palihug magsinabtanay lang ta, maningkamot mi ma apod jud ta tanan”, matud ni Shimura sa iyang facebook post.

Samtang sa Malapascua ug Carnaza Island nga parehong sakop sa Daanbantayan una kining napadad-an sa DSWD og relief assistance human sa pagkuso-kuso sa bagyo.

Ang Daanbantayan adunay 27,000 nga kinatibuk-an nga households.

Giingong nikabat ngadto sa 9, 765 ka balay ang partially damaged samtang 5, 248 ang totally damaged sa lungsod ug ubay-ubay usab ang napabakwit.

Gipaubos na dayon sa state of calamity ang lungsod aron magamit ang calamity fund niini.

Ang lungsod adunay P3 milyones nga calamity fund ug giangkon si Shimura nga dili kini paigo nga ayuda alang sa mga residente nga apektado ug sa pag-ayo sa mga imprastraktura ug agrikultura nga nagusbat sa bagyo.

Si Gobernador Gwendolyn Garcia una nang nagkanayon nga ilang gitan-aw ang paghatag og financial assistance sa mga nagub-an og balay apan i-assess pa ang mahatag sa probinsya nga hinabang aron ipalit og materyales. /BDB (BANATNEWS)