Nagpakaaron-ingnong kidnapper nadakpan

CEBU, Philippines —  Gidakop sa Anti-Kidnapping Group 7 ang usa ka lalaki human nga nangilad nga gikidnap ang usa ka 18 anyos nga babaye nga gika-report nga missing sulod na sa upat ka adlaw.

Giila ang dinakpan nga si Jade Sabroso nga taga lungsod sa Maco, Compostela Valley Province sa Mindanao.

Gidakop si Sabroso pinaagi sa joint entrapment operation sa AKG 7 ug AKG 11 didto sa Dakbayan sa Tagum niadtong Sabado.

Si Sabroso miangkon nga iyaha lang gisakyan ang post sa social media sa pamilya sa 18 anyos nga babayeng na-missing.

Tungod sa kawad-on ug kay gusto kining makakwarta iyang giilad ang pamilya sa dalaga kansang papa head security sa usa ka resort sa lungsod sa Sogod dinhi Probinsya sa Sugbo.  

Na-missing ang 18 anyos nga babaye sugod niadtong adlaw nga Martes human niadto sa Dakbayan sa Lapu-Lapu samtang gibantayan ang apohan nga na-admit sa tambalanan sa Cebu City apan wala na kini makontak pa hangtud pagkasunod adlaw.

Tungod niini, gi-post sa amahan ang hitabo apan gisakyan kini ni Sabroso kinsa mi-kontak dayon sa amahan sa dalaga ug gipahibalo nga naa kaniya ang dalaga ug nangayo kini og ransom nga P50 mil.

Matud pa gihulga sa suspek ang amahan nga patyon ug ibaligya ang mga internal organs sa dalaga kun di sila mosanong, hinungdan sa kabalaka sa ilang pamilya.

Ang pamilya nidangop dayon sa Sogod Police kinsa mi-refer kanila sa AKG-7 ug ang maong buhatan na maoy mitawag sa AKG-11.

Na-trace ang inisyal nga P2 mil nga ransom nga gipadala sa account nga gihatag sa suspek didto sa Tagum City ug sa pagkubra niini didto na siya giposasan.

Bisan tuod gipasaylo sa amahan si Sabroso sa iyang gibuhat ipadayon nila ang kaso tungod sa trauma nga ilang giagian.

Sa pagsubay sa AKG-7, natultolan ra ang dalaga kinsa didto ra diay sa Dakbayan sa Talisay.

Kasong robbery with extortion ang ipasaka kang Sabroso apan sutaon sab kun sakop kini og sindikato kay nasuta nga nakabaligya kini sa iyang kidney didto sa kaulohan.  IBM (BANATNEWS)