Binisaya sa elementarya ipahunong sa kapitolyo

CEBU, Philippines — Buot sa Provincial School Board nga ibalik ang paggamit sa English nga medium sa pagtudlo sa eskwelahan sa Cebu Province Division.

Pinaagi sa duha ka resolution nga gipasar sa PSB, gitinguha nga mabalik ang English medium nga maoy paagi sa pagtudlo sa mga core subjects sama sa English, Mathematics ug Science.

Apil nga gitinguha nga ma-prioritize ang pagtudlo sa academics inay mga extra-curricular activities sama sa technolympics, athletic meets ug uban pa.

Si Liloan Mayor Christina Garcia-Frasco kinsa maoy presidente sa League of Municipalities in the Philippines-Cebu Chapter maoy niduso sa mosyon.

Si Gobernador Gwendolyn Garcia nagtuo nga ang pagtudlo sa mother tongue-based education gikan Grade 1 hangtud Grade 3 ug dayon motudlo og Tagalog ug English sa taas nga ang-ang sa elementarya nakapalibog sa mga tinun-an.

Si Garcia nagkanayon nga ang English medium matun-an sa eskwelahan samtang mamahimong makat-on ang bata sa mother tongue o Binisaya sa pag-abot sa balay.

“Why are we trying to lose our competitive advantage in the international arena? Ang mga Koreano, ang mga Hapon, ang ubang mga Asians nagkabuang og tuon og Iningles, kita we are trying our best to forget our English,” matud ni Garcia.

“Gihulagway ni Garcia nga “dismal” ug “embarrassing” o makauuwaw ang rating nga nakuha sa Pilipinas diin ika-79 sa ranking sa 2018 Programme for International Student Assessment (PISA) nga gihimo sa 79 ka nasud.

Sumala sa gobernador nga ang daghan nga extra-curricular activities nakatampo sa hinay nga pagkat-on sa mga bata.

Matud ni Garcia nga kinahanglan tutokan ang academics nga usa sa kinahanglan sa mga bata.

Ang duha ka resolutions sa PSB isumiter kini ngadto sa regional office sa Department of Education Central Visayas pinaagi ni Cebu Provincial Schools Division Superintendent Marilyn Andales.

Gitinguha nga mapatuman ang maong tinguha ngadto sa mga tunghaan sa Cebu Province Division sa sunod school year. (BANAT NEWS)