Quincentennial ilusad ugma

CEBU, Philippines — Subay sa paglusad sa kalihukan sa selebrasyon sa ika-500 nga tuig sa Senyor Santo Niño, temporaryong sirad-an ang pipila ka dalan sa Dakbayan sa Sugbo ugmang adlawa.

Kini naglakip sa eskina Jakosalem St. ug Osmeña Blvd., ug eskina P. Burgos St. ug Osmeña Blvd., ug Burgos gikan Legaspi ngadto na sa Magallanes St. gikan sa alas 8 sa buntag hangtud mahuman ang launching program.

Ang gate sa Basilica Minore del Santo Niño sirado kini gikan sa alas 11 sa buntag alang sa security clearing ug buksan kini pagbalik alas 12 sa udto diin ipatuman usab ang "no backpack policy" hangtud mahuman ang programa.

Ang kalihukan sugdan sa “open-to-the-public conference” sa alas 3 sa hapon diin alas 2 sa hapon ang registration.

Isunod ang concelebrated mass nga dumalahon ni Papal Nuncio to the Philippines, His Excellency Most Rev. Gabriele G. Caccia, D.D.

Si Rev. Fr. Genesis Labana, director sa Media Centre sa Basilica, niingon nga hugot nga seguridad ang ipatuman sa simbahan tungod sa presensiya sa Papal Nuncio. Apil sa mga kalihukan ang awarding sa grand winner sa Quincentennial Anniversary Logo Making Contest, blessing sa official Santo Niño Pilgrim Image ug ang pagbukas sa 500 Years logo, website ug plano sa Augustinian alang sa Quincentennial Anniversary.

Malaumon ang kadagkuan sa Basilica nga makatambong sa selebrasyon ang Santo Papa sa Abril 2021.

Gitug-an ni Rev. Fr. Aladdin Luzon, chairman sa Committee on the 500th Anniversary of the Arrival of the Image of Sto. Niño de Cebu, nga ang National Historical Commission of the Philippine inabagan sa Catholic Bishop Conference of the Philippines nipadala na og imbitasyon sa Santo Papa.

Hinoon kun dili gyud makatungha ang Santo Papa, plano sa NHCP ug CBCP ang pagpadala nalang og delegasyon ngadto sa Vatican City aron sa paghimo og selebrasyon sa mao nga dapit.

Si Rev. Fr. Pacifico Nnohara Jr., Rector sa Basilica, niasoy nga gawas sa grand launching, dunay nagkadaiyang kalihukan nga pasiugdahan ang simbahan hangtud sa Abril 7, 2021 nga mao ang mismong adlaw sa 500 Years of the Arrival sa imahe sa Sto. Niño.

“So the Committee decided to visit 500 places this time for 500 years so we have this pilgrimage to visit 500 places actually we started already. We had already in Mindanao we started already Davao, Ozamis then just last week we went to Bulacan, outside the country, South Korea and we have also in Singapore,” matud ni Rev. Fr. Nohara.

Sa pikas bahin, ang pagpabarug sa dakung imahen sa Divine Mercy nga anaa sa 800 ka tiil ang gitas-on sa Barangay Garing, Lungsod sa Consolacion ang gitinguha karon sa pipila ka relihiyusong grupo isip sa pagpahaum sa 500 ka tuig nga kasaulogan sa Kristiyanismo sa nasud.

Maoy mopasiugda sa pagpabarug niini ang Shrine of the Divine Mercy de Cebu Foundation Inc. (SDMCF).

Malantaw kini nga imahen sa may Mactan-Cebu International Airport ug ingon man ang Cebu International Seaport.

Si Imma Alfon nga maoy foundation president sa iyang pamahayag niingon nga ang maong proyekto usa sa duha ka proyekto sa Archdiocese sa Sugbo nga ilang gitinguha nga mahuman ang kaugmaran alang sa Quincentennial celebration sa 2021 sa nasud.

Dugang ni Alfon nga ang Archdiocesan Shrine of the Divine Mercy ang mopahimutang sa maong imahen sa unom ka ektaryang luna nga gidonar sa pamilya ni kanhi Consolacion Mayor Avelino Gungob Sr.

Si Gungob nagkanayon nga ang iyang pagdonar sa luna iyang gikalipay ug gikahinangop isip balik niya sa kaayo nga gihatag kaniya sa Ginoo ug sa mga grasya nga iyang nadawat.

Ang ikaduha nga proyekto mao ang higanteng imahen sa Our Lady of Fatima sa Lungsod sa San Remigio.

Ang SDMCF ang nakiglambigit sa serbisyo sa inilang urban planner ug architect nga si Felino “Jun” Palafox nga maoy motabang sa kaugmaran sa mokabat sa 27 ka ektaryang luna sa maong lugar. GMR (BANATNEWS)