CLO mo imbestigar fast food chain

CEBU, Philippines — Ang City Legal Office sa Dakbayan sa Sugbo nakadawat na kini og “letter of explanation” gikan sa branch manager sa fast food chain kinsa niapil sa pag-ukopar sa sidewalk diha sa Osmeña Boulevard.

Ang maong fast food chain gipaesplika kini sa CLO sa giingong nahimo niining kalapasan sa National Building Code of the Philippines tungod sa pag-ukopar niini sa sidewalk.

Si Adonis Magsino, branch manager sa fast food diha duol sa Basilica Minore Del Santo Niño nipasabot nga nag-abang lang sila sa building sukad niadtong tuig 2010 ug dili sila ang tag-iya ug nagpatukod niini.

Matud ni Magsino nga ang tag-iya sa building nitugot kanila nga bag-ohon ang sulod nga bahin niini sanglit ang maong building natukod niadto pang tuig 1920.

Ang maong building pwede kining mahimong usa sa mga heritage site tungod kay 100 ka tuig na ang nakalabay sa pagtukod niini.

Nipasabot si Magsino nga dili nila intensiyon nga moukopar o makabalda diha sa sidewalk o sa bisan unsang mga kabtangan sa gobiyerno.

Si Atty. Rey Gealon, hepe sa CLO nagkanayon nga nunot sa esplikar ni Magsino ang iyang buhatan ug ang Office of the Building Official (OBO) mopahigayon gihapon og imbestigasyon. (/BDB)(BANATNEWS)