11 sikop kay nag-refill og lpg sa lata sa butane
CEBU, Philippines – Duha ka mga gidudahang illegal nga refilling station sa liquefied petroleum gas sa Dakbayan sa Talisay ug sa Lapu-Lapu ang gironda sa mga otoridad ug onse ka mga tawo ang nasikop niadtong adlaw nga Huwebes.
Sa operasyon nga gilusad sa kabumberohan, kapulisan ug sa taga Department of Energy (DOE) sa Parba Compound sa Barangay Lawaan 2, Syudad sa Talisay nadakpan ang mga nag-refill niini nga sila si Victor Quilaton, 45, taga Basak, Syudad sa Sugbo; Elmer Salbado, 23; ug si Maria Elena Bernabat alyas Em-Em, 36; nagpuyo sa maong dapit.
Si Mayor Gerald Anthony “Samsam” Gullas Jr. nalipay sa aksyon sa lokal nga kabumberohan ug kapulisan inubanan sa taga DOE.
Matud sa mayor seryoso siya sa pagpadakop ug pagsakmit sa mga ilegal nga nagpadagan sa refilling stations tungod kay kini maoy mga hinungdan sa mga nahitabong sunog sa ilang siyudad.
Dili siya katugot nga mausab ang panghitabo kay mahimo pa nga makaamong kini og laing panimay ug mahimo pa nga makadisgrasya og kinabuhi.
Miabot sa 53 ka tangke sa LPG ug dul-an 100 ka butane canisters ingon man kagamitan sa pag-refill og LPG sa maong mga lata ang mga nasakmit.
“I am serious and if necessary, I will direct the police and the local fire department to implement the full force of the law against you if you are involved in these kinds of operations,” sa post ni Gullas sa iyang Facebook Page.
Dakong tabang ang impormasyon sa katawhan nga miresulta sa positibo nga operasyon hinungdan nga nagpasalamat ang mayor sa katawhan.
Ang DOE ug ang BFP niingon nga dili para sa LPG ang lata sa butane tungod kay nipis kini ug daling mobuto kun masipyat sa karga.
Kini maoy gitumbok nga hinungdan sa mga pagulbo ug sunog sa mga nanglabay nga mga katuigan. Ug sayo lang ning semanaha, niulbo ang susamang refilling station sa San Roque, maayo nalang nga way naangol.
Sa laing operasyon, walo ka tawo sab ang nadakpan sa mga sakop sa City Mobile Force Company (CMFC) sa usa ka illegal refilling station sa Sitio Soong Center sa Barangay Mactan, Dakbayan sa Lapu-Lapu sa miaging adlaw.
Si Police Lieutenant Colonel Dexter Calacar, pangulo sa CMFC sa Lapu-Lapu City Police Office (LLCPO) miila sa ilang dinakpan nga naglakip sa tag-iya sa maong butane refilling station nga mao si Dionesio Suplaag, 48, taga Purok Limonsito sa Barangay Umapad, Dakbayan sa Mandaue.
Gidakop sab og apil ang iyang mga trabahante nga sila si Gleen Nuñez, 26; Anthony Rey Cal, 23; Randy Suplaag, 44, Arjay Hatamosa, 20; Ricky Torrejos, 22; ug Aljun Torrejos,22; pulos taga Dakbayan sa Danao ug Angelo Cal nga taga Barangay Danasan sa mao gihapong dakbayan.
Matud pa ni Calacar ang mismong mga molupyo sa lugar ang mireklamo kay nahadlok silang masunog ilang lugar kay pirme silang makatimaho og baho sa hungaw nga LPG gikan sa maong balay nga giingong giabangan sa grupo.
Ang Lapu-Lapu sama sa Talisay aduna nay mga nahitabong sunog nga ang hinungdan ang pagulbo sa illegal nga refilling stations.
Dali nilang gihimo ang pakisusi ug ilang naaktohan ang ilegal nilang gihimo hinungdan nga ilang gipangsikop.
Nakuha gikan kanila ang 16 LPG nga tangke, 12 ka mga walay sulod nga tangke ug upat usab ka tangke sa LPG ang adunay sulod na niini.
Dugang nilang nasakmit ang 2,900 ka mga lata sa butane diin 192 niini na-refill na ug padung nang ihatud.
Ang mga dinakpan sa parehong operasyon kasohan og paglapas sa Presidential Decree 1865 o illegal trade of petroleum products. (Romeo T. Limpangog/IBM)(BANAT NEWS)
- Latest