Osmeña nibabag paggamit sa halin sa SRP

CEBU, Philippines – Gipasakaan og kaso ni kanhi mayor Tomas Osmeña ang kagamhanan sa Siyudad sa Sugbo ug ang mga kompanya nga namalit sa luna sa South Road Properties aron dili magamit ang kwarta sa maong transaksyon.

Ang 76 ka pahina nga reklamo ni Osmeña iyang gisang-at pinaagi ni Atty. Amando Virgil Ligutan sa SALigal Law firm niadtong Lunes sa hapon, usa ka adlaw sa wala pa gituki sa konseho ang gisugyot nga P2.5 bilyones nga supplemental budget-2 nga naggamit sa kwarta nga halin sa luna sa SRP isip source of fund.

Apan ang pagpasaka sa kaso ni Osmeña wala nakapapugong sa konseho sa siyudad nga aprobahan ang P2.5 bilyones ug magamit ang kwarta nga nakolekta gikan sa consortium sa SM, Ayala, ug Cebu Holdings, Inc.

Ang gipasakang kaso ni Osmeña mao ang declaratory relief nga nangayo og temporary restraining order ug writ of preliminary injunction batok ni Mayor Edgardo Labella, Sangguniang Panlungsod, SM Prime Holdings, Inc., Ayala Land, Inc., Cebu Holdings, Inc., Filinvest Land, Inc., Filinvest Alabang, Inc., Cyberzone Properties, Inc., Anesy Holdings Corporation, Igold Holdings Corporation, ug Betterfield Phils. Corp.

Si Osmeña, sa iyang reklamo, niingon nga adunay daghang depekto sa Negotiated Sale on Installment nga gipatuman kaniadtong Agosto 7, 2015 nga naglambigit sa pagbaligya sa 26.3 ektarya nga yuta sa consortium sa Ayala Land, Cebu Holdings Inc. ug SM Prime Holdings og P10 bilyones ug ang 19.2-ektaryang kabtangan nga gibaligya sa Filinvest Land Inc. og P6.7 bilyones.

Pipila sa mga depekto nga gikutlo ni Osmeña mao ang wala’y gihatag nga awtoridad sa Siyudad sa Sugbo nga mosulod sa Negotiated Sales on Installment; ang konseho nipasar sa usa ka resolusyon sa wala pa ipadayon ang proseso sa pag-bid sa mga luna sa SRP; ang konseho  nipasar sa resolusyon nga nagpaundang sa dugang nga aksyon sa pagbaligya; ang Committee on Awards napakyas sa pagsunod sa standard nga pamaagi sa gobiyerno alang sa pag-post sa public bidding sa usa ka publiko nga lugar ug uban pa.

Tungod niini, gihangyo ni Osmeña ang korte nga moisyu og TRO ug writ of preliminary injunction aron mapugngan ang siyudad sa pagpatuman sa gikwestiyon nga mga kontrata ug aron dili magamit ang kwarta nga gibayad sa mga kompanya ngadto sa siyudad.

Gihangyo sab ni Osmeña ang korte nga wagtangon ang seguridad sa bid sa SM-Ayala Consortium pabor sa Siyudad sa Sugbo ug uban pa.

Apan matud ni City Attorney Rey Gealon nga andam ang iyang opisina sa pagtubag sa maong kaso batok sa kagamhanan sa siyudad. (/GMR)(BANAT NEWS)