Pinuy-anan sa mga durugista gibantayan

CEBU, Philippines — Higpit nga gibantayan sa kapolisan sa Mandaue City Police Office (MCPO) ang mga dapit nga ilang namatikdan nga sagad gipuy-an sa mga nalambigit sa ilegal nga drugas.

Si Police Colonel Julian Entoma, direktor sa MCPO, niingon nga ilang gihimo ang pagpatrolya sa maong mga dapit aron mapakgang ang mga ilegal nga kalihukan.

Matud ni Entoma nga kuwang ang mga service patrol cars sa MCPO maong nangayo sila og dugang 18 ka patrol cars nga gamiton sa mga polis sa pagpatrolya.

Tumong ni Entoma ang pagtubag sa gihangyo ni Mayor Jonas Cortes nga higpit nga bantayan ang matag barangay sa dakbayan sa ingon nga mapugngan sab ang mga krimen.

Si Entoma niila sa mga dapit nga maoy nasentro karon sa ilang pagbantay mao ang Barangay Looc sa habig sa may Mandaue-Mactan Bridge, relocation site  sa Barangay Paknaan, Barangay Maguikay, dalan A.S. Fortuna ug ingon man ang Banilad.

Samtang nadakpan sa kapolisan ang pito ka pusher og shabu nga naglakip sa duha ka babaye sa managlahi nga buy-bust operation sa Dakbayan sa Lapu-Lapu.

Si Police Captain Airbert Jay Samson sa City Intelligence Branch (CIB) sa Lapu-Lapu City Police Office niila sa nadakpan sulod sa usa ka lodging house sa Barangay Pajo nga si Junijie Sacayan, 30, usa ka construction worker sa Barangay Ibo sa maong dakbayan.

Matud ni Samson nga nakuha nila gikan kang Sacayan mao ang walo ka putos nga shabu nga nagkantidad og P10,800; P1,000 nga buy-bust money ug P300 nga kwarta.

Giila usab ni Samson ang lain nilang nadakpan sa Barangay Pusok nga si Francisco Lumaad, 46, usa ka habal-habal driver, sa dalan Dimataga, Barangay Poblacion nga nakuhaan og shabu nga balor og P9,866 ingon man P1,000 nga buy-bust money.

Nadakpan sab si Eustaquio Montalbo Jr. ug Maylyn Baja Potot, hingkod, taga Purok Shooting Star, Barangay Babag kinsa nakuhaan ug unom ka putos nga shabu nga mokabat sa kapin P10 mil ang kantidad ug P500 nga buy-bust money.

Samtang sa Soong, Mactan sa maong dakbayan maoy nadakpan nila ni Police Major Miguel Andiza Bolalaque sila si Julius Malingin Pajonilla, 31, nga nagpuyo sa maong dapit, Michael Jordan, ug usa ka babaye nga si Arcelyn Comendador, 31, taga Poblacion sa maong dakb ayan. (/GMR)(BANATNEWS)