Comelec sa Talisay nangandam sa eleksiyon sa barangay
CEBU, Philippines — Nabalik na isip election officer sa Siyudad sa Talisay si Atty. Gallardo Escobar human sa gipahigayong lahugay sa nilabay’ng eleksiyon sa buwan sa Mayo, niining tuiga.
Si Escobar gikan sa Dakbayan sa Toledo ug gihulipan siya ni Atty. Charise Faith Sojor nga gikan sa Siyudad sa Naga.
Sa iyang pagbalik, si Escobar nagkanayon nga lain na usab nila nga gipangandaman mao ang pagpangrehistro karong Agosto 1 hangtud sa Septiyembre 30 niining tuiga. Matud ni Escobar nga ang pagrehistro karon usa sa mga pagpangandam alang sa eleksiyon sa barangay sa sunod tuig.
Matud usab ni Escobar nga tentative pa hinuon ang schedule nga ilang gisunod.
Sa nasayran, ang mga opisyal sa Comelec sa kaulohan nipadayag nang daan nga lisod nga magpahigayon na usab og eleksiyon sa sunod tuig gumikan kay menus na og budget.
Gani lakip ang Senado nikomentaryo labot sa pag-postponed sa piniliay.
Apan si Escobar nipasabot nga mas maayo nga mangandam silang daan tungod kay wala pay opisyal nga desisyon kon makanselar ba ang eleksiyon sa barangay nga gikatakda sa Mayo 11 sa sunod tuig. (BANAT NEWS)
- Latest
