Gwardiya gibanhigan patay
CEBU, Philippines – Patay ang usa ka gwardiya human gipusil sa wa mailhing lalaki kagahapon sa kaadlawon diha sa C. Padilla Street, sa Barangay Mambaling sa Dakbayan sa Sugbo.
Ang biktima giila nga si Jay Fernando Rusiana Cruz,48 , lumolupyo sa Ma. Gochan Street, Barangay Mambaling sa Dakbayan sa Sugbu.
Base sa imbestigasyon nga gipanguluhan sa grupo nila Police Lt. Michael Echavez ang biktima nagsakay og motor ug pag-abot sa maong dapit kalit kining gipusil sa wa mailhing lalaki.
Ang biktima natumba kauban sa iyang motorsiklo samtang mamumuno dali nga nisibat padung sa direksyon sa downtown area.
Daling niresponde ang Cebu City Emergency Medical Services nga gipangulohan ni Mark Lauriana apan wala na kini pinitik sa pulso.
Matud pa nga nakaangkon og samad pinusilan sa ulo ang biktima nga maoy hinungdan sa kamatayon niini. Nakakuha ang Scene of the Crime Operatives -7 nga gipangulohan ni Police Lt. Prescilo Libato og mga basiyo sa bala sa kalibre .45 diha sa crime scene.
Matud ni Police Master Sergeant Nicolo Gonzalez nga naay personal nga kalagot ang mamumuno sa hinungdan sa pagpusil niya sa biktima. (/IBM)(BANAT NEWS)
- Latest
