Lima ka kongresista sakop sa One Cebu

CEBU, Philippines – Ang lima ka mga kongresista nga midaug sa milabay nga eleksiyon karong tuiga, mga kaalyado ni Governor-elect Gwendolyn Garcia ubos sa ilang partido nga One Cebu ug PDP-Laban ug duha lang ka kongresista ang dili kaalyado.

Basi sa resulta sa piniliay niadtong Lunes, sa Unang Distrito, midaug si City of Talisay Mayor Eduardo Gullas ubos sa NUP human siya makakuha og 236, 944 ka botos sa naasoy nga distrito ug naproklamar na niadtong Martes, Mayo 14.

Si Gullas giatbangan og laing duha ka kandidato. Sa Ika-duhang Distrito, nasublian pag-usab si Kongresista Wilfredo “Willy” Caminero human siya makakuha og 66, 166 ka botos. Midagan siya ubos sa Nationalist People’s Coalition (NPC) ug didto siya misuporta sa tandem nila ni Bise Gobernador Agnes Magpale ug Gobernador Hilario Davide III. Sa Tersero Distrito, mananaug usab ang igsuon ni Gwen nga si Pablo John “PJ” Garcia sa pagka-kongresista. Iyang napildi ang kanhi senador ug kasamtangang mayor sa Dakbayan sa Toledo nga si John Henry Osmeña ug si Gaye Yapha.

Si PJ nakakuha og 100, 303 ka botos, kon itandi kang Osmeña nga nakakuha og 39, 286 ug Yapha nga 31, 157.

Wala pa hinuon maapil ang botos sa Dakbayan sa Toledo nga ubos sa maong distrito sanglit wala pa ma-transmit ang election result niini.

Sa Kwatro Distrito, napildi ni Janice Salimbangon ang kanhi mayor sa Siyudad sa Bogo nga si Junie Martinez.

Si Janice nga asawa ni Kongresista Benhur nakakuha og 136, 582 kon itandi sa 103, 493 nga botos ni Martinez.

Si Salimbangon milansar ubos sa PDP-Laban. Sa Kinto Distrito nga maoy balwarte sa pamilyang Durano, gipildi ni Duke Frasco ang kasamtangang kongresista niini nga si Red Durano. Si Lolylpop Ouano-Dizon usab ang kandidato sa PDP-Laban maoy gipili pagka kongresista sa mga taga Dakbayan sa Mandaue ug sa mga kalungsuran sa Consolacion ug Cordova nga sakop sa Sixto Distrito. Samtang sa Ika-pito nga Distrito, wala mapulihi ni kanhi Dumanjug mayor Nelson Garcia ang kasamtangang kongresista niini nga si Peter John Calderon kinsa midagan ubos sa NPC ug misuporta usab sa Magpale-Davide tandem.

Sa pagsuwat niining balita, wala pa pormal nga gideklara sila si congressmen-elect PJ Garcia ug Calderon. (/DILT)(BANAT NEWS)