Oplan Baklas sa Mandaue gitakda

CEBU, Philippines —  Gitakda karong Abril 26 ang pagpahigayon og Oplan Baklas sa buhatan sa Comelec sa Dakbayan sa Mandaue diin ilang pangkanlaton ug pangtangtangon ang mga streamers, campaign poster, tarpaulin ug uban pa nga adunay dagway sa mga local ug national nga mga kandidato.

 Si Jacqueline Reuyan, ang Comelec Election Assistant officer sa maong dakbayan miingon nga ang maong kalihukan isip katumanan sa direktiba nga giluwatan sa ulohan nilang buhatan.

Gitataw niya nga ang ilang makuha nga mga campaign posters, ilang hiposon sa bodega sa ilang buhatan samtang ilang gipaabot ang panahon sa pag-dispose niini.

Sa nasayran nga niadtong Marso 8 ug Marso 30, ang Comelec Mandaue City nakapahigayon  na og Oplan Baklas.

Asoy ni Reuyan nga kasagaran sa nakuha nilang campaign posters mao ang gipahimutang sa electrical posts ug pipila niini gilansang sa mga sanga sa kahoy, butang nga gidili sa lagda sa ilang buhatan ug sa Department of Environment and  Natural Resources.  DILT (BANATNEWS)