Davide: Estriktohon ang pagsusi sa buildings una mohatag og fire clearance

CEBU, Philippines — Giawhag ni Gobernador Hilario Davide,III ang Bureau of Fire Protection (BFP) nga estriktohon ang pagsusi sa mga establisamento pagsiguro nga luwas o makalikay sa sunog.

Nabantayan ni Davide nga bisan ang bulan sa Marso maoy fire prevention month apan daghan ang insidente sa sunog.

“BFP should also be strict sa ilang inspection bitaw sa mga buildings...Before they issued clearances”, matud ni Davide.

Sa publiko, si Davide niawhag usab nga magbinantayon hilabina sa mga nagpuyo diha sa nagsikit- sikit nga mga panimalay.

Nunot niini, gibuksan kagahapon sa buntag ang mga kalihokan sa Fire Prevention Month sa nagkadaiyang buhatan sa kabomberohan nga matapos hangtud karong Marso 31 niining tuiga.  

Sa maong pagbukas sa  kabomberohan sa Dakbayan sa Lapu-Lapu ug Dakbayan sa Mandaue adunay gipahigayon nga Santos nga Misa.

Ang kabomberohan nipahimangno sa katawhan sa pagkamabinantayon aron malikayan ang sunog.

Samtang ang fire marshall sa Dakbayan sa Sugbo Chief Inspector Noel Nelson Ababon subling nanawagan karon sa katawhan nga magmatngon kanunay ilabi na sa unang quarter karong tuiga daghang dagkong sunog tungod sa electrical misuse o adunay mga bata nga nagduwa-duwa og posporo.

Matud ni Ababon nga gikanahanglan ang dugang pagmatngon karong panahona ilabin ting-init na ug kadaghanan sa mga tawo ang mogamit og daghan nga appliances.

Kinahanglan nga pagngon ang mga appliances nga walay gamit ug ibton kini sa outlet aron sa paglikay sa sunog.

Samtang si Senior Inspector Arra Alapajaro, fire marshal sa Siyudad sa Talisay nagkanayon nga nagkalain-laing kalihukan ilang ipahigayon sulodd sa tibuok buwan.

Ilang target mao ang kabataan aron sila masayod sa mga butang nga malayo sila sa disgrasya.

Sa pagsud sa tuig 2019 niabot na og walo ang ilang natala nga sunog apil na niini ang mga grass fire.

Ilahang gitutokan nga barangay mao ang Tanke, San Isidro ug Tabunok nga adunay sikit-sikit nga mga panimalay. (Rowena D. Capistrano, Romeo T. Limpangog ug Gabriel C. Bonjoc/BDB)(BANATNEWS)