Mga dagkong luna napalit og Chinese druglords

CEBU, Philippines — Pipila ka mga dagkong luna sa Mandaue City ug sa Lapu-Lapu City ang matud pa napalit ug gipanagiya karon og mga gidudahang Chinese drug lords sumala pa sa nagpadayong inquiry bahin sa ilegal nga drugs diha sa House of the Representatives committee on dangerous drugs.

Sumala pa sa report gikan sa The Philippine Star News Service, gawas sa maong duha ka siyudad sa Sugbu, naa pay laing daghang mga luna sa nagkadaiyang probinsya sa Pilipinas ang napalit sab sa grupo sa gihulagway nga drug kingpin ug iyang mga associates nga mga Chinese sa maong hearing.

Si Atty. Salvalente Elizalde, ang chief sa Legal Division sa Land Registration Authority  mitug-an sa committee hearing miingon nga bukas ang gobiyerno nga gukdon ug bawion kining maong mga luna nga gibanabanang nagkantidad og bilyones ka pesos.

Dunay pagduda nga kining pagpamalit nila og mga dagkong luna dinhi sa Pilipinas, dunay koneksyon sa nagpadayong tensiyon tali sa Pilipinas ug sa China diha sa West Philippine Sea aron sila makaimpluwensiya dinhi.

“There has to be a court order. However, we commit right now that we will monitor the properties,” matud pang Elizalde ngadto sa mga opisyal ug miyembro sa komitiba.

Mao kini ang iyang tubag sa dihang gipangutana siya nilang Reps. Romeo Acop (Antipolo), Dan Fernandez (Laguna) ug Joseph Paduano (Abang-Lingkod party-list) kun unsa may proseso o buhaton sa gobiyerno aron mabawi kining maong mga propiyedad.

Si Elizalde mitubag sa panel nga gipangulohan ni Surigao del Norte second district Rep. Robert Ace Barbers, nga moendorsar ang LRA ngadto sa Office of the Solicitor General nga moduso og “adverse claim” ngadto sa korte aron bawion kining maong mga luna gikan sa mga Chinese nationals.

Kun kining napalit gipanagiya sa gobiyerno, mohimo og reversion proceeding ang LRA ug Office of the Solicitor General nga maoy mobarog nga abogado sa nasudnong kagamhanan atol sa hearing sa kaso.

Si Barbers miingon nga kinahanglang nakahibalo ang publiko bahin aning mga kwestyonableng mga propiyedad.

“These acquired properties are questionable. We also have to protect those to whom these properties were sold. We also want to know how were they (Chinese) able to buy these properties, how big are they? Were payments in cash? Through the banks? Or laundered money?” pangutana pa ni Barbers.

Ang uban pang lugar kun diin nakapalit og lapad nga mga luna ang grupo ni Ong, naa sa Mexico, San Fernando, ug Angeles City sa Pampanga; Nueva Ecija, Cabanatuan City, Aurora Province, Bulacan, Cavite City, Tagaytay City, Iloilo City.

Naa sab sa Lingayen, Pangasinan, Mandaue City, Lapu-lapu City, Valenzuela City, Quezon City, Rizal, Muntinlupa City, Taguig City, Makati City, Malabon, Paranaque City, Manila, Davao del Norte, Isulan, Sultan Kudarat, ug Tabuk, Kalinga, Apayao.

Base sa data nga gikan sa LRA, ang kompanyang Empire 999 nakapalit og 41 ka tituladong land holdings:  kang Ong 59; Aedi Tai Yang 11; Jack Tai Yang, 15; Michelle Santos Sy, 72; Elain Chua 75; Albert Valdez Sy, 22; Na Wang, 1; Ana Ong, 10; Ana Ang, 5; Cai Quimeng,   Chinese nga pangalang Willie Ong, 6; ug James Valdez, 3.

Ang tanan matud pa konektado sa nagkutay-kutay nga mga kompanya nga giporma sa gidudahang Chinese drug lord nga si Michael Yang kinsa gitudlo kaniadtong presidential economic adviser sa termino ni kanhi presidente Duterte.

Si Yang gisumonan apan wala motambong sa hearing sa miaging semana, gitumbok sa kanhi anti-drug law enforcement officer nga si Police Colonel Eduardo Acierto ug whistle blower Arturo Lascanas nga drug king pin nga nagbase sa Davao City.— /IBM (BANAT NEWS)