P3 milyones nga shabu nasakmit sa tulo ka durugista sa Talisay

CEBU, Philippines — Miabot sa P3 milyones nga kantidad nga gituohang shabu ang nasakmit gikan sa tulo ka durugista diha sa Sitio Sawsawan, Barangay San Roque, Dakbayan sa Talisay niadtong Sabado sa gabii.

Ang subject sa operasyon mao ang usa ka Wenceslao Daan Molato alyas Wiwin kinsa maoy target sa maong operasyon, ug kauban nga silang Jomari John Pelipas Banate alyas Joe ug July Lauron Abadiez Jr.,  nga mga residente sa maong lugar.

Ang grupo sa Drug Enforcement Unit (DEU) pinangulohan ni Police Lt. Col. Epream Paguyod nakahigayon sa pakigsabot ni Wiwin aron palitan kini og shabu, ang naulahi dali sab kaayong misanong.

Nagpakaaron ingnon nga mopalit og drugas ang kapolisan hangtud nga nikagat ang suspek ug kini ilang nadakpan apil ang duha niini ka mga kauban.

Nakuha gikan kanila ang shabu nga nitimbang og 505 gramos nga adunay gibana-bana nga balor nga P3,434,000.

Ang mga dinakpan gibalhug sa bilangguan nga gikatakda nga pasakaan og kaso karong adlawa.— /IBM (BANAT NEWS)