Establisimento niinsister nga walay nahimong kalapasan

CEBU, Philippines — Usa sa mga establisamento diha sa Mahiga Creek ang niisister nga wala silay kalapasan nga nahimo kalabot sa 3-meter easement ug gitumbok niini ang nagkadaghan nga informal settler nga giingong maoy hinungdan sa problema sa pagdagayday sa tubig diha sa lugar.

Si Aderson Comar, north sector river commander sa Task Force Gubat sa Baha nipadala og final notice ngadto sa hingtungdan establisimento niadtong Mayo 24, 2024 apan ang Prince Court Hotel nitumbok sa ilang punto nga ilang giduso sa buhatan sa mayor niadtong Disyembre 9, 2022.

Ang maong notice sa task force magsilbi kining last chance sa tag-iya sa establisimento nga boluntaryong mohawan sa ilang estraktura nga gitukod diha sa 3-meter easement.

Ug kung ang tag-iya sa establisimento dili manumbaling padayonon gyud sa kagamhanan sa siyudad ang clearing operations.

Nasayran nga ang Prince Court dekada na kini sa iyang existence ug gihatagan kini og mga necessary permits.

Ang legal cousel sa hotel Atty. Ma. Dyna Pescante ang nitumbok usab nga walay problema kaniadto ang pagdagayday sa tubig sa sapa.

Si Pescante nipasangil nga gumikan sa nagkadaghang informal settler sa palibot diha sa lugar ug pagpataka og labay sa mga basura ang hinungdan sa problema niining ulahing mga tuig.

Gawas niini, gitumbok usab sa establisamento nga ang gihatag nga value sa estraktura nga sobra sa basehan nga kantidad nga nikabat ngadto sa P300,000 ubos sa Part 4, Article 704 sa New Civil Code of the Philippines nga ang pagtangtang sa estraktura nga walay judicial proceedings matawag kini nga kalapasan sa balaod.

Ug gumikan niini, naglaom sila nga ang task force mohatag og konsiderasyon sa maong sitwasyon.

Nagkanayon ang establisamento nga padayon sila nga motuman sa rules and regulations pagsulbad sa problema sa baha diha sa lugar.

Nunot niini, ang tag-iya sa FLC Building nga giingong nakalapas sa 3-meter easement ang nipadayag nga motuman sa inisiyatibo sa kagamhanan sa siyudad sa pagprotekta sa kalikupan ug sa kuluwasan sa tanan apan kuwang sila og financial resources alang sa pagpahigayon og demolition. — /DBDB (BANAT NEWS)