Rehab sa landfill di makabuylo

CEBU, Philippines — Mihangyo ang Cebu City Environment and Natural Resources Office (CCENRO) sa Environmental Management Bureau-7 sa pag-convene sa Multipartite Monitoring Team (MMT).

Matud sa pangulo sa CCENRO nga si Nida Cabrera kinahanglan i-convene ang MMT aron pag-review sa closure ug rehabilitation plan sa Inayawan landfill.

Niadtong miaging semana ang iyang buhatan nagpadala og suwat sa EMB-7 labot niini apan wala pa kini tubag atol sa pagkutlo ning maong balita.

Gibutyag ni Cabrera nga ang MMT gi-dissolved dihang si kanhi Department of Environment and Natural Resources Office (DENR) Secretary Gina Lopez miisyu og administrative order sa EMB-7 nga nagdili kanila sa pagpangulo sa MMT.

Karon nga ang city government nagkinahanglan og assistance sa EMB-7 alang sa rehabilitasyon sa landfill misuway sila og hangyo sa maong ahensiya pagbuhi sa MMT. Nagkanayon si Cabrera nga importante nga tugutan ang MMT sa pag-evaluate sa rekomendasyon nga gihatag sa Full Advantage Philippine Inc., usa ka negotiated firm nga nagtuon sa kahimtang sa landfill.

Kon ang MMT makapagawas sa ilang opinyon labot sa closure ug rehabilitation plan sa dumping site, i-sumetir kini sa City Council alang sa dugang deliberation ug approval. Ang plano mao nga i-convert ang landfill sa eco-industrial area, sports hub, eco-park ug terminals.

Niumol og tulo ka rekomendasyon ang Full Advantage human ilang nakita nga pipila kini sa feasible projects alang sa dumping site nga gisirad-an sulod na sa duha ka tuig.

Ang pribadong firm nga nakabase sa Manila nagsugod og assess sa sitwasyon sa landfill niadtong Abril 2018 ug niadtong Oktubre.

Kon aprubahan sa City Council ug sa mayor ang maong rehabilitation plan magsugod sila og implementar sa plano.

Bisan paman og naay issue sa ownership sa landfill, matud ni Cabrera nga ang siyudad adunay obligasyon sa pag-rehabilitate sa maong pasilidad.  DILT (BANAT NEWS)