Apil sa pag-ambush?

CEBU, Philippines – Ig-agaw sa gipasanginlang gunman sa Reluya-ambush nadakpan sa mga sakop sa Criminal Investigation and Detection Group-7 (CIDG-7) sa kasong paghupot og illegal nga armas niadtong Miyerkules sa gabii.

Ang maong dinakpan giila nga si Jomar Racar Labitad alyas Jonmar, 35, residente sa Sitio Crossing, Barangay Camp 4, Talisay City. Sigun sa report sa CIDG-7, gisilbihan nila kini og warrant of arrest sa kasong paghupot og illegal nga armas gikan  ni Judge Glenda C. Go, Presiding Judge sa Regional Trial Court 7  Branch 65, sa Dakbayan sa Talisay City, niadto pang Enero 7, 2019.

Matud pa ni Police Chief Inspector Lirio Coral, sa CIDG-7, nga bag-o lang nilang nailhan si Jomar nga sakop sa grupo sa self- confessed drug lord nga si Franz Sabalones.

Sama sa iyang ig-agaw nga si Jerome Labitad, usa usab kini ka gun-for-hire dinhi sa Sugbo. Samtang ang direktor sa Cebu Provincial Police Office nga si Police Senior Supt. Manuel Javier Abrugena nagkanayon nga ilang ipatan-aw sa mga testigo si Jomar kun apil ba kini sa Reluya- ambush.

"Hindi po na-mention itong Jomar Labitad, makikipag-coordinate kami sa CIDG and they will be interviewing him and titignan natin kung makakuha tayo ng lead at ipapakita natin ang larawan nitong si Jomar sa ating witness baka po mamukhaan po niya ito," si Abrugena nagkanayon.

Ang SITG- Reluya nitumbok kang si Jerome nga usa sa tulo ka mga gunmen sa maong ambush. Gipakita ni Abrugena sa media ang namugna nga diagram sa mga suspek labot sa pagpamanhig kang San Fernando Mayor Lakambini Reluya ug mga kaubanan.

Giingong nanawngan sa usa sa mga survivor si Jerome ug ang usa ka Felix Abacajan Jr. apan sa maong diagram aduna pay usa ka gunman ug drayber sa mga suspek nga wala pa mailhi.  Namatay sa maong ambush ang bana ni Reluya nga si ABC President Ricardo 'Nonoy' Reluya ug duha ka mga staff.

Apan si Jomar kusganong mihimakak nga kaila sila ni Jerome ug dili sab tinuod nga siya gun for hire ug sakop ni Sabalones.

"Wa ko kaila ana, parehas ra mi'g apelyedo. Wa ko kahibaw ana ilang kalihukan nagtinarong ko’g trabaho pagka construction worker," tug-an ni Jomar sa Banat News.

Sa pikas bahin, giawhag ni Police Regional Office-7 nga si Chief Supt. Debold Sinas ang mga opisyal sa lungsod sa San Fernando magpahigayon og peace covenant signing alang sa malinawon nga piniliay karong Mayo.

Nasayran nga politika ang gitutokang anggulo sa pagpamanhig sa mayor.

Ang hepe sab sa San Fernando Police Station nga si Chief Inspector Lymel Pasquin mitug-an sa Banat News nga karong Sabado magpulong sila kauban ang Commission on Elections, mga incumbent officials ug mga modagan sa eleksyon aron sabotan ang maong pinirmahay.

Ang peace covenant magsilbing pinirmahang panaad sa mga politiko nga dili motisok og kagubot karong eleksyon.

Kagahapong adlawa, nagpinirmahay og peace covenant ang mga kandidato sa Lungsod sa Consolacion diha sa San Narciso Parish uban sa kapolisan ug Department of Interior and Local Government. (/IBM)(BANAT NEWS)