Desinyo sa skate park planohon pa og maayo

CEBU, Philippines — Mipadayag og kaandam ang Cebu City government nga mohimo og adjustments sa design sa 4,000 square meters nga skate park facility nga tukuron sa dili madugay sa likod nga bahin sa Fort San Pedro subay na usab sa sugyot ni Asian Games gold medalist Margielyn Didal. Si Konsehal Mary Ann delos Santos miingon nga sakto ang gipadayag nga technical concerns ni Didal. Ang Konsehal direktang nakig-istorya kang Didal sanglit residente man sab kini sa Barangay Lahug. Nasayran nga niadtong Martes si Didal miingon nga ang kasamtangang disenyo sa skate park peligro sa disgrasya kay mubo ug hagip-ot ang street course niini. Sayo niini, si Konsehal Eugenio Gabuya Jr., tsirman sa Committee on Games Amusement and Sports miasoy nga ang first phase sa skate park project naglangkub sa street courses ug flat courses nga nagkantidad og P5 million.

Sa second phase aduna unyay half pipe, bowl, pump track, ug mini grand stand.

Ang kagamhanan sa siyudad nakadesisyon nga tungaon ang pagpahimo sa skate park sa duha ka phases sanglit ang available funds sa pagkakaron anaa lang sa P5 million nga gi-donate ni Victoria Maria “Minnie” Osmeña, igsuon ni Mayor Tomas Osmeña. Moabot sa P12 milyones ang katukuran sa maong skate park ug ang kagamhanan nangita na og pamaagi sa kuwang aron kini makumpleto.

Si delos Santos wala’y ideya kon maapektuhan ba ang timeline sa construction sanglit ila pang i-finalize ang tanan sa labing dali nga panahon.

Gilauman unta nga sunod semana sugdan ang konstraksiyon sa skate park human gipahigayon ang ground breaking niadtong Martes. Karong adlawa dunay himoon nga meeting tali nilang Didal ug kaubanan alang sa kahingpitan sa disenyo sa skate park.

Sa iyang bahin, si Konsehal Joel Garganera miingon nga angay maminaw sa yangungo sa mga skateboarding enthusiasts ang kagamhanan aron dili mausik ang kwarta nga ipatukod sa maong pasilidad.

Gidayeg ni Garganera si Minnie sa paghatag og kwarta alang sa phase one sa naasoy nga proyekto. – DILT (BANAT NEWS)