Dul-an P10M shabu, mga armas nasakmit

CEBU, Philippines – Dul-an sa P10 milyones nga kantidad sa shabu ang nasakmit sa kapolisan sa gihimong tulo ka operasyon sa Dakbayan sa Talisay ug Dakbayan sa Sugbo kagahapong adlawa. Sa unang operayson pito ka durugista ang nadakpan didto sa Camella Homes, Barangay Lawaan 1, Dakbayan sa Talisay sa alas 2 sa hapon.

Si Insp. Alejandro Batobalonos, Provincial Drug Enforcement Unit sa Cebu Provincial Police Office (CPPO) niila sa subject sa operasyon nga sila si Cheryl Herongay, 30. Apan naabtan usab didto sa panimalay ni Herongay  sila si Teodoro Alisoso Jr., 31, iyang kapuyo; Essel Herongay, 37; iyang igsuon; Jeromey Herongay, 20; pag-umangkon ni Herongay; Rolly Flores, 30; Suzette Bobbier, 38; ug si John Edward Cañedo, 19. Si Batobalonos nagkanayon nga usa ka buwan nilang gipanid-an ang managkapuyo ug dunay usa ka higayon nga nakabantay ang grupo ug namalhin. Maayo nalang adunay naka-tip kanila sa bag-o nilang gipuy-an.

Ang report nga nadawat nga daghang mga tawo nga magsulod ug gawas sa ilang giabangang panimay hinungdan nga gidudahan dayon sila hangtud nga naabot sa kapolisan ang impormasyon.

Nasakmit gikan sa panimalay ang 88 ka gagmay, 32 ka mediums ug tulo ka dagko nga pakite sa shabu pulos adunay nga nitimbang moabot sa 240 gramos nga mokabat P2.8 milyones. Nakuha usab ang usa ka KG-9 submachine pistol ug .45 kalibreng armas nga dunay mga bala. Gikonsiderar ang subject nga High Value Target (HVT) gumikan sa kantidad sa shabu nga nakuha gikan kanila. Si Alisoso niangkon sa maong salaud gumikan sa ilang kawad-on apan si Essel nirason nga giimbitar lang sila sa iyang igsuon kay namarayeg tungod sa birthday sa ilang pag-umangkon.

Matud pa ni Batobalonos nga rason lang kini sa mga suspek kay sa ilang pag-abot naabtan silang nag repack og shabu.

Pagkataud-taod niana, nihimo og followup operation grupo tungod kay adunay kasabot nga laing durugista si Cheryl  diha sa Barangay Dumlog sa mao gihapong dakbayan. Tuod man, nilampos sila ug nadakpan ang kasabot ni Cheryl nga si Arnel Baclay De Lima, 50, kinsa nakuhaan og shabu nga nikantidad og P4,425,000 milyones. Sa laing bahin, ang kapulisan sa Pari-an Police Sation  nihimo og linaing operasyon ug niresulta sa pagkasikop ni John Ryan Saballa, 18, nga taga San Jose Village sa Barangay Tisa, Cebu City.

Nasakmit gikan kaniya ang 150 gramos nga gidudahang shabu nga mokantidad og P1,770,000.  Sa kinatibuk-an, miabot og P9, 027,000 ang tanang shabu nga nasakmit sa kapolisan sa probinsya ug sa dakbayan kagahapon.— (Clydyl Avila/IBM)(BANAT NEWS)