Greyhound operation gilusad sa TCJ

CEBU, Philippines – Tungod sa tinguha sa bag-ong nilingkod nga Jail Warden sa Talisay City Jail nga nahimutang sa may Barangay Maghaway Talisay City, nihangyo siya sa Police Regional Office 7 ubos sa pagpangulo ni Chief Supt. Debold Sinas nga mohimo og halapad nga greyhound operations.

Matud pa ni Senior Inspector Crisyriel Awe, Oktobre 4 pa siya niasumir isip bag-ong jail warden sa Talisay ug niadtong Lunes personal siyang ni- request sa PRO-7 nga mohimo og lapad nga greyhound operations tungod kay aduna man gihapon silay mga makuha nga palusot nga kontrabando bisan subsob ilang operation.

Sumala pa ni Awe, kadaghanan sa iyang mga sakop mga bag-o hinungdan gipaubos silang tanan og kinalit nga drug test ug pulos negatibo. Gitug-an ni Awe, sa 894 ka mga inmates ang 80 porsiyento niini pulos kaso sa drugas ang giatubang. Ang ilang prisohan gihimo para lang sa 200 ngadto sa 300 ka priso apan karon naghuot na.

Matud niya aduna gihapoy mga drug personalities sa maong prisohan bisan og nawala na ang kanhi high value target nga si Steve Go nga gibalhin sa Mandaue  City Jail diin kini didto napatay sa laing inmate. Sa greyhound operation kagahapon ubay-ubay nga mga kontrabando ang nasakmit gikan sa walo ka mga selda sa lalaki nga inmates ug sa usa gikan sa female dorm.

Samtang si Sinas, sa iyang bahin nitug-an aduna silay mga palisiya sa dili pa sila mohimo ug halapad nga greyhound operation ug usa niini ang pagpaubos sa drug test sa tanang personnel sa prisohan.

Gibutyag sa director nga dul-an sa P200 mil nga cash ang ilang nakuha apan gi turnover nila kini sa warden ilabi na nga adunay mga otorisadong tindahan sa sulod sa prisohan.

Ipasusi usab nila ang mga nasakmit nga mga tambal nga walay mga pangalan ug may nasakmit ang mga mahait nga hinagiban. (Rowena D. Capistrano/IBM)(BANAT NEWS)