Mga negosyo ni Lim gibombahan

CEBU, Philippines — Duha ka establisamento nga giingong gipanag-iya sa kontrobersiyal nga pinangita sa balaod nga si Peter Lim ang gilabay og improvised explosive device (IED) sa riding-in-tandem kagahapon sa kaadlawon.

Ang gipabuthan mao ang atubangan sa usa ka Chuva Chuva Massage Parlor sa Tres Borces Street, Barangay Mabolo, siyudad sa Sugbo.

Si Superintendent Ryan Devaras, hepe sa Investigation, Detection and Management Branch (IDMB) sa Cebu City Police Office (CCPO) miingon nga naguba ang atubangan nga bahin sa maong massage parlor, apil ang kisame ug ang bildo nga bungbong tungod sa pagbuto sa IED.

Maayo nalang nga walay nasamdan sa maong hitabo.

Ang security guard sa maong shop mitug-an sa kapulisan nga duha ka wala mailhing tawo nga nagsakay sa motorsiklo ang mihunong sa ilang atubangan ug milabay og botelyang may pabilo ug mibuto kini.

“Allegedly (kang Lim), but dili ta ka-conclude dayun og wala ta’y evidence. We cannot really determine kinsay tag-iya nga supposedly nakaplastada sa ilang tindahan (business permits) but sa among investigation wala naman so unidentified pa,” matud ni Devaras.

Wala maabti og usa ka oras, ang Infinity KTV Bar and Music Lounge nga gipanag-iya gihapon ni Lim diha sa Archbishop Reyes Avenue, Barangay Kamputhaw ning dakbayan ang gilabayan usab og IED apan wala nakabuto.

Si Police Chief Inspector Maria Theresa Macatangay, hepe sa Abellana Police Station miingon nga wala pa silay nadawat nga statement gikan sa management sa maong bar.

Si Devaras miingon nga padayon pa ang ilang imbestigasyon niining duha ka  hitabo. Ilaha usab gitan-aw kon konektado ang duha ug kung usa lang naghimo niini.

Sa laing bahin si Police Chief Inspector John Abreu, hepe sa Explosive Ordnance Disposal (EOD) mitug-an sa Banat News nga ang narekober nga IED sa Infinity bar usa kini ka tiklong o dinamita nga sagad gigamit sa illegal nga panagat.

Ilaha pang itandi ang nakuhang ebidensiya sa massage parlor ug sa wala nakabuto nga IED kon pareho ba.

Niadto lang Hunyo gisuwayan og sunog sa tulo ka wala mailhing tawo ang Infinity KTV bar.

Diha usab sa gawas gisuwayan pag- ambush ang igsuon ni Lim nga si Wellington sa mga wala mailhing armadong tawo niadtong Marso.

Si Lim, ginganlan ni Presidente Rodrigo Duterte nga adunay kalambigitan sa illegal nga drugas. Nalutsan kini og warrant of arrest gikan sa Makati City Regional Trial Court (RTC) niadtong Agusto 14 apan hangtud karon wa pa kini masikop.

Niadtong Hulyo, usa usab ka establisamento ni Lim sa Barangay Subangdako, Siyudad sa Mandaue ang gipabuthan og IED.

Si Abreu miingon nga parehong nagamit og igniter ang IED nga nakuha sa Infinity bar karon lang ug sa IED nga gigamit sa Mandaue. (/IBM)(BANATNEWS)