Bayranan sa mga Marcos
Mapupos karong Disyembre 2, 2026 ang tagal sa balaud alang sa gobiyerno sa pagkolekta sa estate tax liability sa pamilyang Marcos nga nagkantidad og P203 bilyones. Kun ugaling dili makolekta sa Bureau of Internal Revenue (BIR) ang nahisgutan nga kantidad kutob sa Disyembre 2, 2026, mawagtangan na og katungod ang gobyerno sa pagkolekta niini. Aron dili mawagtang ang katungod sa gobiyerno sa pagkolekta sa nahisgotan nga estate tax liability sa pamilyang Marcos gikinahanglan nga mopadala og bag-ong suwat ang BIR ngadto sa mga Marcos nga nag-demand o mando kanila sa pagbayad sa P203B.
Kun hinumduman, ang BIR mihimo og assessment sa estate tax sa mga kabtangan sa namatay nga si Ferdinand Edralin Marcos Sr. niadtong 1991. Sa maong assessnent nakita sa BIR nga adunay bayronon nga P23.29 bilyones ang mga mosunod sa katigayonan sa namatay nga kanhi Presidente sa Pilipinas.
Ang assessment sa BIR giuyonan sa Korte Suprema sa nahimo niining hukom ug ang nahisgotang hukom nahimo kining final ug executory niadtong 1999.
Ang estate tax liability sa mga sumusunod sa diktador misulbong na kini ngadto sa P203 bilyones niadtong Disyembre 2021.
Niadtong Disyembre 2, 2021 ang BIR mipadala og suwat ngadto sa mga Marcos ug gimandoan kini sa pagbayad sa ilang estate tax liability apan hangtod karon wala gihapon kini mobayad.
Makolekta ug mobayad kaha ang mga sumusunod sa diktador sa ilang bayranan nga buhis? Mora’g duol sa posibilidad nga dili sila mobayad ug dako ang posibilidad nga limot-limotan lang sa BIR ang pagpaningil niini ngadto sa mga Marcos.
Hinumdumi ninyo nga ang BIR Commissioner nga si Rolando Ligo Jr. tinudlo ni Presidente Bongbong Marcos Jr. ug ang Presidente dili lamang sumusunod sa katigayonan sa iyang amahan nga diktador, siya pa gayod ang administrador sa katigayonan sa iyang amahan.
Kun mobayad pa ang mga Marcos sa ilang bayranan sa buhis dugay ra unta kini nila nga gibayran ilabi na nga ang usa sa mga sunusunod mao na ang Presidente sa Pilipinas.
- Latest

















