Bag-ong hepe sa PDEA-7 nikurtesiya kang Tomas

CEBU, Philippines – Nilingkod na sa iyang posisyon isip bag-ong hepe sa Philippine Drug Enforcement Agency (PDEA)-7 niadtong Agosto 1 niining tuiga si Atty. Wardley Getalla.

Si Getalla nakigkita kini kang Cebu City Mayor Tomas Osmeña kagahapon sa buntag diha sa Cebu City Hall.

Si Getalla nibutyag nga daghan sila og nahisgutan ni Osmeña lakip na niini ang kampaniya batok sa ilegal nga drugas nga ilang priority project.

Gawas sa ilang anti-drug operation nagplano usab sila sa pag-intensify sa Barangay Drug Clearing Operations diin tumong niini nga ma-drug cleared ang mga barangay pinaagi sa interventions diin ang mga user ipaubos sa rehabilitation, dakpon ang mga drug personality ug ilusad usab nila ang Balay Silangan.

Sa panagtabo ni Getalla ug Osmeña gihatagan siya sa mayor og update sa sitwasyon sa ginadiling drugas sa Dakbayan sa Sugbo ug natuki usab nila ang gisugyot niini nga reformatory rehabilitation.

Ang kagamhanan sa Siyudad sa Sugbo nihatag og suporta sa PDEA-7 pinaagi sa paghatag og service vehicles ug gitataw sa director dili sila magpanuko og dangop sa siyudad kon magkinahanglan sila og dugang assistance. (/BDB)(BANAT NEWS)